YECHL. Ikkinchi kungi bahslar qanday natijalar bilan tugadi
Kecha oqshom Yevropa chempionlar ligasining ikkinchi kungi bahslari bo‘lib o‘tdi. Mazkur o‘yinlardan "Manchester Yunayted" — “Atalanta” to‘qnashuvi keskin va murosasiz o‘tgani bilan muxlislar yodida qoldi.
Dastlab hisobda ikki to‘p farqi bilan orqada borayotgan ingliz klubi natijada Reshford, Maguayr va Ronalduning goli evaziga irodali g‘alabaga erishdi. Guruhning ikkinchi o‘yinida “Vilyareal" "Yang Boyz" ustidan 4:1 hisobda ustun keldi. Mazkur bahslardan so‘ng manchesterliklar guruhda 6 ochko bilan peshqadamlik qilmoqda. “Atalanta” va "Yang Boyz" keyingi o‘rinlardan joy olgan.
“E” guruhi peshqadami bo‘lib turgan “Bavariya” bu safar ham raqiblarini ayab o‘tirmadi. Bu gal nemislar “Benfika”ni 4:0 hisobda mag‘lub etdi va 9 ochko bilan guruhning yaqqol peshqadami bo‘lib oldi. Guruhning ikkinchi o‘yinida “Barselona” 2Dinamo Kiyev"dan bitta to‘p farqi bilan ustun keldi va dastlabki g‘alabasini qo‘lga kiritdi.
Natijada kataloniyaliklar 3 ochko bilan uchinchi o‘ringa joylashdi. “Benfika” 4 ochko bilan ikkinchi pog‘onada bormoqda. "Dinamo Kiyev" 1 ochko bilan so‘ngi o‘rinni egallab turibdi.
Kecha Angliyaning “Chelsi” klubi ham ishonchli g‘alabani qo‘lga kiritdi. “Malmyo” qarshi kechgan bahsda inglizlar javobsiz 4 ta gol urishga muvaffaq bo‘ldi. “H” guruhining ikkinchi o‘yini “Yuventus” va “Zenita” klublari ishtirokida o‘tdi.
Natijada italiyaliklar safarda 0:1 hisobida g‘alaba qozonib uch ochkoni qo‘lga kiritdi. Hozirda guruhda “Yuventus” 9 ochko bilan birinchi, “Chelsi” 6 ochko bilan ikkinchi o‘rinda bormoqda. Keyingi pog‘onalardan “Zenit” va “Malmyo” jamoalari joy olgan.
“G” guruhida ham navbatdagi bahslar o‘tkazildi. Unda “Lill” o‘z uyida “Sevilya” bilan durang o‘ynagan bo‘lsa, “Zalsburg” “Volfsburg” ustidan 3:1 hisobida ustun keldi. Mazkur guruhda “Zalsburg” 7 ochko bilan birinchi o‘rinda bormoqda. 3 ochko jamg‘argan “Sevilya” ikkinchi o‘rinni egallab turibdi. Keyingi pog‘onalarni “Lill” va “Volfsburg” jamoalari band etgan.
Jamshidbek Amirov
