Har yili “trend”ga chiqadigan talabalar muammosi uzog‘i bilan 4 yilda hal etiladi
Viloyatdan poytaxtga o‘qishga kelgan yigit-qizlarning yagona maqsadi — kvartira izlab topish. Har yili yangi o‘quv yili boshlanishi arafasida talabalar orasida yotoqxona muammosi “trend”ga chiqadi. Ularni qiynaydigan bu muammo bartaraf etiladimi? Yoki har yilgidek, eski hammom — eski tosligicha qolaverdimi? Aslida, bu borada qanday ishlar amalga oshirilmoqda? Bugun Xalqaro media-xollda bo‘lib o‘tgan ochiq muloqotda Oliy va o‘rta maxsus taʼlim vaziri Abduqodir Toshqulov bu kabi savollarga javob berdi.
"Sifatli taʼlim — inson kapitaliga sarmoya" mavzusidagi muloqotda Maktabgacha taʼlim vazirligi, Oliy va o‘rta maxsus taʼlim vazirligi, Xalq taʼlimi vazirligi, O‘zbekiston Fanlar akademiyasi, Innovatsion rivojlanish vazirligi rahbariyati va soha mutaxassislari ishtirok etdi.
Taʼkidlanganidek, respublikada joriy yilning may oyigacha 58 ming o‘rinli talabalar turar joyi mavjud edi. Yildan-yilga oliy taʼlimga talabalar qamrovi ortib borayotgani hisobiga yotoqxonaga bo‘lgan talab ham ortib bormoqda.
Oliy va o‘rta maxsus taʼlim vaziri Abduqodir Toshqulovning qayd etishicha, so‘nggi uch oyda mavjud talabalar yotoqxonasida 30 mingta yangi o‘rin yaratildi. Shuningdek, 10 ming o‘rinli yangi talabalar turar joyi qurildi.
Biz bu bilan muammo to‘liq yechildi deya olmaymiz, — deydi A.Toshqulov. — Vazirlar mahkamasining tegishli qarori bilan so‘nggi 4 yilda yana 100 ming o‘ringa mo‘ljallangan talabalar turar joyi qurilish ko‘zda tutilgan.
Shuningdek, tadbirda bu yil 100 ming nafar talaba chet davlatdan O‘zbekistonga o‘qishini ko‘chirishi uchun ariza bilan murojaat qilgani, shuningdek, OTM joriy o‘quv yilidan boshlab kredit modul tizimiga to‘liq o‘tgani kabi masalalarga ham to‘xtalib o‘tildi.
Bahriniso Madumarova
