Saylov kuni tana harorati yuqori bo‘lganlar uchun alohida kabina va quti tashkillashtiriladi
Bu haqda Bosh davlat sanitariya vrachi Bahodir Yusupaliyev Markaziy saylov komissiyasining matbuot markazida bo‘lib o‘tgan matbuot anjumanida maʼlum qildi.
Saylovchilar va saylov jarayonining boshqa ishtirokchilari o‘rtasida tana harorati 37 daraja va undan yuqori bo‘lganlar aniqlangan taqdirda, ular ovoz berish xonasiga kiritilmasdan ovoz berishlari uchun alohida ajratilgan joylarda ko‘chma saylov qutilari va kabinalar tashkil etildi.
Qolaversa, tana harorati 37 daraja va undan yuqori bo‘lganlar hamda kasallik alomatlari aniqlanganlar uchun alohida izolyator xonalari hamda saylov binolarida tibbiy xonalar tashkil etildi. Ular zarur dori-darmonlar hamda tibbiy vositalar bilan bilan ham to‘liq taʼminlandi.
Bahodir Yusupaliyevning taʼkidlashicha, shifoxonalardagi saylov uchastkalariga “yopiq saylov uchastkasi” maqomi berildi. Mustaqil yurish imkoniyati bo‘lgan bemorlar uchun shifoxona hududida maxsus tayyorlangan xonada ovoz berishlari tashkillashtirildi, yotoq rejimidagi bemorlar uchun maxsus mobil saylov qutilari tashkil etildi.
O‘zbekiston Respublikasi Prezidenti saylovi o‘tkaziladigan saylov uchastkalarida karantin talablariga rioya etilishini taʼminlash uchun jami 21 mingdan ortiq tibbiy xodim biriktirildi. Ularga dam olish kuni ishlashi bois ularga qo‘shimcha haq to‘lanadi.
Hozirgi kunda Sanitariya-epidemiologik osoyishtalik va jamoat salomatligi xizmati tomonidan tizimli va markazlashgan holda har bir saylov uchastkasida zararsizlantirish (dezinfeksiya) ishlari o‘tkazilmoqda.
Okrug va uchastka saylov komissiyalari joylashgan binolarga kamida bir nafardan tibbiyot xodimi biriktirildi va ular tomonidan saylov komissiyalari binolarining kirish qismida tashrif buyuruvchilarning tana haroratini o‘lchash, antiseptik vosita bilan qo‘llarini dezinfeksiya qilish va zaruratga ko‘ra himoya niqobi berish ishlari tashkillashtirildi.
Bahriniso Madumarova
