Andijonda "Collegium Humanum" Varshava menejment universitetining filiali ochildi
Hozirda mazkur nodavlat oliy o‘quv yurti Asaka agrotexnologiyalar texnikumining bir qismida tashkil etilgan.
Ushbu taʼlim dargohiga "Collegium Humanum" Varshava menejment universiteti rektori Pavel Cherneskiy tashrif buyurib, mazkur nodavlat oliy o‘quv yurtining ochilishiga bag‘ishlangan tadbirda O‘zbekiston va Polsha o‘rtasida ijtimoiy-iqtisodiy hamda ilm-fan, taʼlim yo‘nalishidagi aloqalar yangi bosqichga ko‘tarilayotganligini taʼkidladi.
Ochilish marosimida taʼkidlanganidek, Vazirlar Mahkamasi joriy yil 14 aprelda “Collegium Humanum” Varshava menejment universitetining Andijon filialini tashkil etish to‘g‘risida”gi qaror qabul qilgan edi. polshalik investorlar ushbu loyiha uchun umumiy qiymati 2,6 million dollarga teng mablag‘ ajratdi.
Yangi universitet filialini tashkil etish loyihasining birinchi bosqichi doirasida 500 ming dollar xorijiy investisiyalar o‘zlashtirildi.
Hozirda mazkur nodavlat oliy o‘quv yurti Asaka agrotexnologiyalar texnikumining bir qismida tashkil etilgan.
Muassasaning dastlabki bosqichida “Moliya va buxgalteriya hisobi”, “Transport va logistikada menejment”, “Xalqaro biznes va marketing”, “Turizm, mehmonxona ishi va umumiy ovqatlanishda menejment va marketing”, “Kichik va o‘rta biznesni boshqarish”, “Axborot-kommunikatsiya texnologiyalari” bakalavriat taʼlim yo‘nalishlari bo‘yicha mutaxassislar tayyorlanadi.
Filialga talabalar joriy yildan qabul qilinadi. O‘qish O‘zbekiston Respublikasi davlat taʼlim standartlarini inkor etmagan holda muassis tomonidan tasdiqlanadigan o‘quv rejasi va fan dasturlariga muvofiq tashkil etiladi.
Shu bilan birga, kunduzgi taʼlim shaklida o‘zbek, ingliz va rus tillarida to‘lov-kontrakt asosida amalga oshirilishi ko‘zda tutilgan.
Eslatib o‘tamiz, bundan avval toshkentda Markaziy Оsiyo xalqaro instituti ochilgani va “Yangi O‘zbekiston” universitetining ochilish marosimi bo‘lib o‘tgani haqida xabar berilgandi. Shuningdek, Sunʼiy intellektni rivojlantirish ilmiy-tadqiqot instituti hamda Zangiotada Farmatsevtika texnik universiteti tashkil etilishi xabar qilingandi.
Cho‘lponoy Ahmedova
