Toshkent davlat yuridik universitetiga o‘qishga kirishda tarix fani o‘rniga huquqiy fanlardan test topshirish amaliyoti joriy etiladi
Maʼlum bo‘lishicha, bugungi kunda toshkent davlat yuridik universitetiga o‘qishga kirishda abituriyentlar 2 ta bo‘limdan iborat 5 ta fan majmuasidan test sinovlari topshiradi.
1-bo‘limda barcha yo‘nalishlar uchun majburiy
3 ta fan – Ona tili (o‘zbek, rus yoki qoraqalpoq tili), Matematika va O‘zbekiston tarixi;
2-bo‘limda 2 ta fan – Tarix va Chet tili fanlari jamlangan.
TDYUU Kengashi 2023/2024 o‘quv yilidan boshlab mutaxassislik blokidagi Tarix fani o‘rniga huquqiy fanlarni kiritish to‘g‘risida qaror qabul qildi.
Yaʼni bu yangilik keyingi yildan emas, balki 2 yildan keyin joriy qilinadi. Boshqacha aytganda hozir maktabda 11-sinfda o‘qiyotganlar keyingi yil imtihonda tarixdan test topshiradi, hozir 10-sinfda o‘qiyotganlar esa 2023 yili testda tarix o‘rniga huquqiy fanlardan test topshiradi.
Maʼlumot o‘rnida, bugungi kunda maktablarida 4 yil davomida yuqori sinflarda Davlat va huquq asoslari hamda Konstitutsiyaviy huquq asoslari fanlari o‘qitib kelinmoqda. Test savollari ushbu maktab darsliklari asosida tuziladi. Shuningdek, bu qaror maktablarda huquqiy fanlarni o‘qitish rivojiga katta hissa qo‘shadi, afsuski huquq fanlari test sinovlarida bo‘lmagani sababli o‘quvchilarda bu fanlarni o‘qishga qiziqish yo‘q.
Endilikda yoshlar maktab davridanoq huquqiy fanlarni o‘qishga kirishadi, bu ularda o‘quvchilik davridanoq huquqiy bilimlarining oshishiga turtki beradi.
Eslatib o‘tamiz, avvalroq dtm test materiallari tarqalayotgani yuzasidan izoh bergani haqida xabar berilgandi.
Cho‘lponoy Ahmedova
