Bugun, 1-noyabrdan nimalar o‘zgaradi?
Yangi oy boshida turibmiz. Xo‘sh, noyabr oyida qanday o‘zgarishlar bo‘ladi?
Imkoniyati cheklangan yoki imtiyozli toifaga kiruvchi fuqarolar uchun
Mazkur oydan boshlab imkoniyati cheklangan shaxslarga davlat xizmatlaridan foydalanganda 50 foizlik chegirma beriladi.
Bunda «Ijtimoiy himoya yagona reyestri» axborot tizimida ro‘yxatga olingan, shuningdek, I va II guruh nogironligi bo‘lgan shaxslar nazarda tutilgan. Ular uchun davlat xizmatlari markazlari va YAIDXP orqali davlat xizmatlarini ko‘rsatishda davlat bojlari, yig‘imlar va boshqa har qanday to‘lovlar bo‘yicha 50 foiz miqdorida chegirma qo‘llaniladi. Biroq tadbirkorlar bundan mustasno.
Eʼtiborli jihati, mazkur oydan imtiyozli toifaga kiruvchi shaxslar ayrim tibbiy xizmatlar uchun nodavlat tibbiyot tashkilotlaridan bepul foydalanishi mumkin. Bunda ketadigan xarajatlar byudjet hisobidan qoplab beriladi .
Mahallada ishlovchi xodimlar uchun
Agar hududida mingdan ortiq xonadon bo‘lsa, mahalla xodimlarining maoshi 35 foizga oshiriladi.
Oilada aziyat chekayotgan jabrdiydalar uchun
Oilaviy zo‘ravonlik holatlari bo‘yicha xabar berish tizimi yo‘lga qo‘yiladi. Bunda jabrdiydalarni ximoya qilish, ularning haq-huquqlarini tiklash ustivor vasifa sifatida ish olib belgilanganhttps://lex.uz/docs/5670659.
Boquvchisini yo‘qotgan yoki chin yetimlar uchun
Bundan tashqari, ota-ona qaramog‘idan mahrum bo‘lgan yoki yetim bolalarni qo‘llab-quvvatlash jamg‘armalari tashkil etiladi.
Mehnat migrantlari uchun
Mehnat migratsiyasida talab yuqori bo‘lgan kasblar to‘g‘risida yagona maʼlumotlar bazasi yaratiladi.
Bunda Bandlik va mehnat munosabatlari vazirligi huzuridagi Mehnat bozori tadqiqotlari instituti tomonidan quyidagilar shakllantiriladi:
• malakali kadrlarga bo‘lgan ehtiyojni baholovchi tizim hamda kasbiy standartlarni va mustaqil malaka baholashning maʼlumotlar bazasi;
• mehnat migratsiyasida talab yuqori bo‘lgan kasblar to‘g‘risida yagona maʼlumotlar bazasi.
Tibbiyot xodimlari uchun
Davlat tibbiyot muassasalari rahbarlari Healthcare Administration yo‘nalishi bo‘yicha o‘qitiladi.
Tadbirkorlar uchun
Mazkur oydan boshlab O‘zbekiston Respublikasi nomidan chet el valyutasida tadbirkorlik loyihalari amalga oshiradigan tadbirkorlarga yana-da qulaylik yaratiladi. Bunda loyihani mablag‘ bilan taʼminlash uchun xalqaro moliya institutlari va xorijiy hukumat moliya tashkilotlari mablag‘lari hisobidan jalb qilingan kreditlar (qarzlar) loyihada ishtirok etuvchi moliya tashkilotlariga 10 yildan kam bo‘lmagan yoki jalb qilingan muddatga qayta kreditlanadi.
Shuningdek, xavflilik darajasi yuqori bo‘lgan ayrim turdagi mahsulotlarni respublika hududiga erkin muomalaga chiqarish tartibi joriy etiladi.Bunda tadbirkor mahsulotini davlat ro‘yxatidan o‘tkazgan bo‘lishi lozim.
Eslatma: jismoniy shaxslar tomonidan o‘z ehtiyojlari uchun qonunchilik hujjatlarida belgilangan meʼyorlar doirasida olib kelingan mahsulotlar bundan mustasno.
Xavflilik darajasi yuqori bo‘lmagan ayrim turdagi mahsulotlarni yigirma to‘rt oy davomida import qilishga ruxsat etiladi. Bunda tadbirkor O‘zbekiston Respublikasining rezidenti hisoblangan akkreditatsiya qilingan muvofiqlikni baholash organlarida muvofiqlik sertifikatini (amal qilish muddatidan qatʼi nazar) hech bo‘lmaganda bir marta rasmiylashtirgan bo‘lishi zarur.
Bundan avval 1 oktyabrdan qonunchilikda nimalar o‘zgargani hamda 1 sentyabrdan ish haqi, pensiyalar, stipendiyalar va nafaqalar miqdori oshirilgani haqida xabar berilgandi.
Olamgir Abdiyev
