Glazgodagi iqlim konferensiyasida muhim deklaratsiya qabul qilindi
Bu 100 dan ortiq davlatlar tomonidan qo‘llab-quvvatlangan.
Glazgoda bo‘lib o‘tayotgan BMT iqlim o‘zgarishi masalalari konferensiyasida yuzdan ortiq davlatlar o‘rmonlar yo‘q bo‘lib ketishiga qarshi kurashni kuchaytirish majburiyatini oldi. Bu haqda DW xabar berdi.
2 noyabr kuni qabul qilingan deklaratsiyada qayd etilishicha, dunyoda o‘rmonlar kesilishi 2030 yilga borib to‘xtalishi kerak. Bu orqali global iqlim isishi oqibatlarini kamaytirish maqsad qilingan.
Ushbu deklaratsiya o‘rmonlarning 85 foizi to‘plangan 100 dan ortiq davlatlar tomonidan qo‘llab-quvvatlandi. Kelishuv 20 milliard dollar ajratilishini ko‘zda tutadi. Bu mablag‘larning bir qismi o‘rmon yong‘inlariga qarshi kurashga va yong‘inlardan aziyat chekkan maydonlarni qayta tiklashga sarflanadi.
Shu bilan birga xalqaro ekologik tashkilot Greenpeace ushbu kelishuvni “yetarli emas” deya baholadi. Tashkilotning so‘zlariga ko‘ra, bu o‘rmonlar ayovsiz kesilishi uchun yana o‘n yil vaqt taqdim etadi.
Maʼlumot o‘rnida: O‘zbekiston Respublikasi Prezidenti Shavkat Mirziyoyev 2-noyabr kuni bo‘lib o‘tgan videoselektor yig‘ilishida yiliga 200 million tup daraxt va buta ko‘chatlarini ekish, shu orqali shaharlardagi yashil maydonlarni hozirgi 8 foizdan 30 foizga oshirish tashabbusini ilgari surdi.
Bundan avval Rim Papasi iqlim o‘zgarishi dunyoda ekologik qochqinlar soni oshishiga olib kelishini maʼlum qilgandi.
Jahongir Qo'ziyev
