“Meyji inqilobi” — "Yapon moʻjizasi"
JICA prezidenti Shinichi Kitaoka o‘zbekistonlik talabalarga onlayn-maʼruza o‘qidi.
Yaponiya iqtisodiy jihatdan Osiyoning yetakchi davlatlaridan biri hisoblanadi. Hozirgi kunda ushbu kunchiqar mamlakatning boy tarixi va o‘ziga xos madaniyati barchani birdek qiziqtiradi. Ularning yaqin tarixiga nazar tashlaydigan bo‘lsak, XIX asrda ro‘y bergan "Meyji inqilobi" tufayli modernizatsiya davri, Ikkinchi jahon urushidan so‘ng qayta tiklanish harakatlari muvaffaqiyatli kechganligiga guvoh bo‘lamiz. Bu tarixda "yapon moʻjizasi" nomini olgan.
O‘zbekistonlik talabalar va o‘qituvchilar uchun “JICA Chair” loyihasini amalga oshirish doirasida tashkilot prezidenti Shinichi Kitaoka tomonidan “Meyji inqilobi: Keng ko‘lamli modernizatsiyaning boshlanishi” mavzusida onlayn-maʼruza o‘tkazildi. Bu haqda “Dunyo” AA xabar berdi.
Shinichi Kitaoka tinglovchilarga O‘zbekiston va Yaponiya o‘rtasidagi ikki tomonlama hamkorlikning hozirgi holati, video orqali oldindan o‘zlashtirilgan "Meyji inqilobi" bo‘yicha o‘zining fikr-mulohazalari hamda qarashlari bilan bo‘lishdi.
Taʼkidlanishicha, ishtirokchilar Yaponiyaning ijtimoiy-iqtisodiy, siyosiy va madaniy sohalaridagi rivojlanish tarixining o‘ziga xos xususiyatlari, jumladan, mamlakatda davlatchilikning tashkil etilishi, dastlabki rivojlanish davrida iqtisodiyotda qishloq xo‘jaligining o‘rni, ilm-fan va taʼlimning mamlakat rivojiga qo‘shgan hissasiga oid maʼlumotlarni bilib olishdi.
Maʼlumot uchun: 1867—68 yillarda Yaponiyada dehqonlar, shahar kambag‘allari, savdo-sanoat korchalonlari, dvoryanlarning quyi tabaqalari, saroy aslzodalari va muxolifatdagi baʼzi yirik zodagonlardan iborat keng omma syogunlarga qarshi chiqadi. Natijada burjua inqilobi — "Meyji inqilobi" sodir bo‘ldi. Syogun hukumati ag‘darildi va hokimiyat imperator Mutsuxito (1867—1912 ylarda hukmronlik qilgan) qo‘liga o‘tgan. Shu davrdan boshlab Yaponiya imperator va uning hukumati boshchiligida tub ijtimoiy-siyosiy va iqtisodiy islohotlar yo‘liga o‘tib, tezlashgan modernizatsiya orqali g‘arb davlatlari darajasiga yetishni o‘z oldiga maqsad qilib qo‘ydi.
Eslatib o‘tamiz, avvalroq avvalroq Toshkent davlat iqtisodiyot va Indoneziya taʼlim universiteti o‘rtasida qo‘shma taʼlim dasturini tashkil etish bo‘yicha shartnoma imzolangani xabar qilingan edi.
