Mening asosiy maqsadim himoya chizig‘idagi muammolarni oz bo‘lsada bartaraf etish – Srechko Katanes

 

Bugun poytaxtimizdagi “Paxtakor” stadionida terma jamoamiz ushbu o‘yin oldidan dastlabki mashg‘ulotlarni o‘tkazdi. Jamoamiz bosh murabbiyi Srechko Katanes mazkur o‘yin oldidan o‘zining fikrlari bilan o‘rtoqlashdi:

 

Dastlab o‘rtoqlik uchrashuviga jalb etilgan futbolchilar haqida to‘xtalib o‘tsangiz?

 

Biz tarkibni doimo O‘zbekiston futbol assotsiatsiyasi bilan hamkorlikda tanlaymiz. Gretsiya termasi jamoamiz uchun yaxshi raqib hisoblanadi. Ikkinchi tomondan bu bizga yaxshigina sinov ham bo‘ladi. Bizda Gretsiyaga qarshi o‘yinga tayyorgarlik ko‘rish uchun yetarlicha vaqt bor. Tarkib haqida gapiradigan bo‘lsak, hozirda markaziy himoyada muammolarimiz mavjud. Xususan, bu galgi yig‘inda Rustam Ashurmatov hamda Shahboz Umarov ayrim sabablarga ko‘ra ishtirok etishmayapti. Mening asosiy maqsadim himoya chizig‘idagi muammolarni oz bo‘lsada bartaraf etish.

 

Siz shu vaqtga qadar bir nechta futbolchilarning o‘yinini kuzatishga erishdingiz. O‘zingiz uchun yangi bo‘lgan nomlarni kashf etdingizmi va qaysi futbolchilarni alohida eʼtirof etgan bo‘lardingiz?

 

Deyarli barcha o‘yinchilarni gapirishimiz mumkin. Men terma murabbiyligiga kelgunga qadar faqat Eldor Shomurodov yoki Jaloliddin Masharipov kabi futbolchilarni bilardim. Hozirda boshqa o‘yinchilarni ham kashf etyapman. Ko‘proq yoshlarga imkoniyat yaratishga harakat qilyapman. Ular xato qilgan taqdirda ham doim qo‘llab-quvvatlaymiz. Chunki, aynan ular orqali terma jamoa o‘yinida qandaydir yangiliklar yaratish mumkin.

 

Bugungi kunda termamizning hujum chizig‘ida raqobat kuchayib bormoqda. Mana shu hujumchilarimizning sermahsulligi sizda qanday taassurot qoldirmoqda?

 

To‘g‘ri hozirda hujum chizig‘imiz nisbatan yaxshi holatda deb aytib o‘tishimiz mumkin. Lekin, alohida u o‘yinchilarga tayangan holda emas, butun jamoani shakllantirishimiz kerak.

 

 

Jamshidbek Amirov