Rossiya olimlari koronavirus tarqalishini to‘xtatadigan yangi moddani aniqlashdi
Bu modda qora murch tarkibida uchraydi.
Qora murch tarkibida uchraydigan piperin moddasi Covid-19 tarqalishini bloklashi mumkin. Rossiya FA sitologiya instituti va Paster nomidagi Sankt-Peterburg epidemiologiya va mikrobiologiya ilmiy tekshirish instituti olimlari o‘tkazgan tadqiqotda shunday xulosaga kelindi.
Tadqiqotda ishtirok etgan olimlardan biri Olga Ostroumova “Vedomosti” nashriga bu haqda aytib o‘tgan. Uning so‘zlariga ko‘ra, inson terisiga yopishadigan oqsillarni bloklaydigan preparatlarni yaratish – koronavirusga qarshi kurashning asosiy yo‘nalishlaridan biri hisoblanadi. Ammo shtammlar va ularning oqsillari tez mutatsiyaga uchraydi. Bu yaratilgan preparatlarning maʼlum vaqtdan keyin samarasi yo‘qolishiga olib keladi.
Rossiya olimlari boshqa yo‘ldan borgan va ular oqsillarni emas, balki inson hujayrasi hamda oqsil membranasini bloklab qo‘yuvchi dori yaratishni maqsad qilgan.
Olimlar piperinga eʼtibor qaratgan. Piperin boshqa bioaktiv qo‘shimchalar tarkibida ishlatib kelinadi. Ostroumova shuningdek, bu moddadan tashqari yana 20 turdagi alkaloidlar ham tajribadan o‘tkazilayotganini maʼlum qilgan. Ammo aynan piperin boshqa moddalardan ko‘ra ko‘proq samara ko‘rsatgan.
Avvalroq Buyuk Britaniya dunyoda birinchi bo‘lib COVID-19 virusiga qarshi dorini tasdiqlagani haqida xabar berilgandi.
Jahongir Qo'ziyev
