Sambochilarimiz jahon chempionatida yana to‘rtda medalni qo‘lga kiritdi
Bugun Toshket shahridagi “Yunusobod” sport majmuasida sambo bo‘yicha jahon chempionatining navbatdagi bahslari bo‘lib o‘tdi.
Bugungi bellashuvlarda to‘rt nafar sambochimiz sovrindorlar qatoridan joy olishga muvaffaq bo‘ldi. Dastlab -71 kg vazn toifasida sportchimiz Istam Qudratov jangovar sambo bahslarida bronza medalini terma jamoamiz hisobiga qo‘shib qo‘ydi. Shundan so‘ng, bahslar qizg‘in pallaga kirdi. -98 kg vaznli sambochimiz Nodirjon Mirxalikov jahon chempionatining finalida rossiyalik Anton Konovalovga qarshi bahs olib bordi va jamoamiz hisobiga navbatdagi oltin medalni taqdim etdi. Jangovar sambo yo‘nalishida yurtimiz sharafini himoya qilgan yana sportchimiz Furqat Ro‘ziyev finalda ukrainalik Vladislav Rudniyevga qarshi jang o‘tkazdi va imkoniyatni boy berib qo‘ydi. Shu tariqa hamyurtimiz kumush medal sohibiga aylandi. -88 kg vazn toifali Sohibjon Hasanboyev (jangovar sambo) finalda rossiyalik Magomed Magomedovga qarshi jang o‘tkazdi va kumush medalni qo‘lga kiritdi.
Avvalroq sambo bo‘yicha jahon chempionatining ikkinchi kuni terma jamoamiz uchun omadli o‘tgani haqida xabar berilgandi.
Jamshidbek Amirov
