"Chorvoq oromgohi" auksionga qo‘yildi
Dam olish maskani 70,35 gektar maydonni egallagan.
Investitsiya kiritish miqdori ixtiyoriy bo‘lib, talabgorlarning xohishiga qarab belgilanadi. Bino-inshootlar maydoni 51 ming 125,88 kvadrat/metrni tashkil etadi.
Davlat aktivlarini sotish ikki bosqichda o‘tkaziladi. Birinchi bosqichda talabgorlar oldindan malakalanadi.
Jumladan, savdolarda qatnashish uchun talab qilingan hujjatlarning to‘liqligi, zakalat puli kelib tushganligi, davlat aktivlaridan kelgusida foydalanish yo‘nalishlariga qo‘yilgan talabga nisbatan talabgor tomonidan taklif etilgan biznes konsepsiyasi loyihasining maqbul yoki maqbul emasligi ko‘rib chiqiladi.
Ikkinchi bosqichda talabgorning tijorat takliflari (sotib olish narxi va to‘lovni amalga oshirish muddati) hamda to‘lov qobiliyati baholanadi.
Talabgorlardan kelib tushgan takliflarni umumlashtirilgan holda ko‘rib chiqish va tegishli qaror qabul qilish uchun davlat mulkini sotishda tender savdolarini o‘tkazish bo‘yicha davlat komissiyasiga kiritiladi. Mazkur komissiya qaroriga asosan g‘olib aniqlanadi. Zakalat puli taklif etilayotgan narxning kamida 5 foiz miqdorida bo‘lishi belgilangan.
Maʼlumot uchun: Toshkent viloyati Bo‘stonliq tumanida joylashgan "Chorvoq oromgohi" dam olish maskani auksionga qo‘yildi. Sotuv bo‘yicha maʼlumotlar E-AUKSION portaliga joylashtirildi.
Eslatib o‘tamiz, “Chotqol” dam olish maskani sotuvga qo‘yilgandi. Avvalroq Toshkent viloyatida oltin qidirish uchun yer maydonlari hamda “Hilton” mehmonxonasi sotuvga qo‘yilgani haqida xabar berilgandi.
