Qashqadaryodagi 68-maktabning achinarli holati yuzasidan rasmiy maʼlumot berildi
Ijtimoiy tarmoqda aks etgan holatdagi sport maydonlarini "mavjud emas" degan iddaolarning o‘rinsiz ekanligiga ham oydinlik kiritildi.
Yaqinda ijtimoiy tarmoqlarda tarqalgan "400 ta o‘quvchisi bor maktabda hech qanday sharoit yo‘q!" sarlavhali post tarqalgan edi.
Mazkur holat yuzasidan Qashqadaryo viloyati xalq taʼlimi boshqarmasi rasmiy munosabat bildirdi.
Unga ko‘ra, 68 umumiy o‘rta taʼlim maktabi 1985 yil tashkil etilgan bo‘lib, 170 o‘rinli, 2 navbatlilikda, 338 nafar o‘quvchi taʼlim-tarbiya olishi aniqlangan.
Maktabda jami 36 nafar o‘qituvchi va 8 nafar texnik xodimlar faoliyat ko‘rsatadi. Shulardan 2 nafar birinchi toifa, ikkinchi toifali o‘qituvchilar soni 5 nafarini va 29 nafar mutaxassislar o‘qituvchilar faoliyat ko‘rsatib kelmoqda. Maktabda o‘quvchilarni sport bilan shug‘ullanishi uchun shart-sharoitlar yaratilgan. Shugningdek, Qarshi tumanidagi ijtimoiy soha obyektlarini 2020-2025 yillarga mo‘ljallangan manzilli dasturiga maktabga yangi 315 o‘rinli qo‘shimcha bino, sport zal qurilishiga taklif berilganligi haqida maʼlumot berildi.
Maktab hududi atrofini devor bilan o‘rash yuzasidan tegishli soha masʼullari nazoratiga olingan.
Bundan tashqari, maktabda 1 ta isitish qozoni mavjud bo‘lib, isitish tizimi tabiiy gaz bilan isitilmoqda.
Maʼlumot uchun: 2018 yilda Qarshi tumani mahalliy byudjetidan xalq taʼlimi bo‘limiga qarashli byudjet muassasalarining bino va inshootlarini joriy taʼmirlash uchun rejalashtirilgan mablag‘lar doirasida 45 mln. so‘mlik mablag‘ ajratilgan.
Mablag‘ hisobidan maktabning eshik, deraza, rom qismi joriy taʼmirlangan hamda 6 ochkoli hojatxona yangidan qurib topshirilgan.
Joriy yil yakuniga qadar tuman hokimligi mahalliy byudjeti hisobidan xalq taʼlimi muassasalarini moddiy texnika bazasini rivojlantirish maqsadida 300 mln. so‘m mablag‘i ajratilishi rejalashtirilgan.
Ushbu maktabdagi mavjud eskirgan parta, stol va doskalarni yangilash rejaga kiritilgan.
Eslatib o‘tamiz, avvalroq Xalq taʼlimi vazirligi 6 oyda xizmat safarlari uchun 400 millionga yaqin xarajat qilishi hamda O‘zbekiston maktablariga fransuz tilidagi badiiy adabiyotlar va darsliklar taqdim etilgani haqida xabar berilgandi.
Cho‘lponoy Ahmedova
