Xalq taʼlimi vazirligi mega-tanlov eʼlon qildi
Tanlovda respublika bo‘yicha g‘olib bo‘lgan o‘quvchilar agar keyingi ikki yil davomida davlat OTMlaridan biriga o‘qishga kirsa, 1 yildan 3 yilgacha kontrakt summalari to‘lab beriladi.
Joriy yilning 20 noyabridan – 20 dekabrigacha bo‘lgan davri mobaynida “Mening Prezidentim” mavzusida o‘tkaziladigan mazkur tanlov 10-, 11-sinflar o‘rtasida bo‘lib o‘tadi. U to‘rt bosqichda, yaʼni maktab, tuman(yoki shahar), viloyat va respublika tarzida amalga oshiriladi.
Tanlovni o‘tkazish tartibi:
✅ maktab bosqichida “Yangi O‘zbekiston meni nigohimda” mavzusida esse yozish;
✅ tuman (shahar) bosqichida “Yangi O‘zbekiston – yangi imkoniyatlar” mavzusida insho yozish;
✅ viloyat va respublika bosqichlarida “Mening Prezidentim” mavzusida taqdimot tayyorlash va uni 15 daqiqa davomida hakamlar hayʼatiga taqdim etish.
Eslatma. Tanlovning respublika bosqichi 21-25 dekabr kunlari Toshkent shahrida o‘tkaziladi.
Diqqat! Xalq taʼlimi vazirligi O‘zbekiston kasaba uyushmalari Federatsiyasi ijroiya qo‘mitasi bilan hamkorlikda tashkil etilayotgan tanlovda o‘zi xos rag‘batlantirish tizimi yo‘lga qo‘yilgan.
“Tanlovning respublika bosqichida g‘oliblikni qo‘lga kiritgan o‘quvchilarga 2022-2023 yoki 2023-2024-o‘quv yilida respublikadagi OTMlariga kirish imtihonlari natijalariga ko‘ra to‘lov-shartnoma asosida talabalikka qabul qilingan taqdirda, ularning mos ravishda 1-,2-, 3-o‘rindagi g‘oliblariga moliyaviy imtiyoz beriladi.”
Jumladan:
1-o‘rin sohibiga 3 yillik;
2-o‘rin sohibiga 2 yillik;
3-o‘rin sohibiga 1 yillik to‘lov-shartnoma pullarini to‘lab berish.
Agar tanlovda g‘olib bo‘lgan o‘quvchi keyingi ikki yil mobaynida davlat granti asosida talabalikka qabul qilinsa, unda mazkur mablag‘lar miqdorida mukofot pullariga ega bo‘ladi.
Shuningdek, tanlovning respublika bosqichida 1-,2-,3-o‘rinni egallagan g‘olib o‘quvchilarning ustozlari, mos ravishda, 30 mln., 20 mln., va 10 mln. so‘m pul mablag‘lari bilan mukofotlanadi.
Bundan tashqari, tanlovning respublika bosqichi g‘oliblari (1-, 2-, 3-o‘rin) taʼlim olayotgan maktablari direktorlariga ham bittadan noutbuk topshiriladi.
Avvalroq Oliy taʼlimga pul evaziga o‘qishga kiritib qo‘yishni vaʼda qilgan shaxs qo‘lga olingani haqida xabar berilgandi.
Olamgir Abdiyev
