Endi shaxslarni sotuvchi “savdogar”larning ro‘yxati tuziladi
Yagona axborot bazasi Ichki ishlar vazirligi Tezkor-qidiruv departamenti tomonidan yuritiladi.
Maʼlum bo‘lishicha, odam savdosi sohasidagi jinoyatlar to‘g‘risidagi maʼlumotlarning yagona axborot bazasini yuritish tartibi to‘g‘risidagi nizom tasdiqlandi.
Unga quyidagi maʼlumotlar kiritiladi:
— odam savdosi bilan shug‘ullanuvchi shaxslar;
— odam savdosidan jabrlanganlar, jabrlangan deb taxmin qilinayotganlar ayollar va bolalar haqidagi axborot alohida ajratilgan holda, ularga ko‘rsatilgan yordam natijalari;
— jinoyat sodir etish usullari va boshqa axborotlar.
Mazkur maʼlumotlardan odam savdosiga qarshi kurashishdagi vakolatli organlar foydalanishi uchun Tezkor-qidiruv departamenti va uning hududiy bo‘linmalariga yozma yoki elektron shaklda so‘rovnoma yuboradi.
So‘rovnoma yuborilgach, uning natijasi 5 kun ichida qanoatlantiriladi.
Eslatib o‘tamiz, avvalroq O‘zbekistonda 6 oyda har 100 ming aholiga 132ta jinoyat to‘g‘ri kelishi hamda Buxoro shahar sudida odam savdosi jinoyatini sodir etgan shaxslarga sud hukmi o‘qilgani haqida xabar berilgandi.
Cho‘lponoy Ahmedova
