Qanday turdagi jamoat birlashmalarini tuzish qonunan taqiqlanishini bilasizmi?
O‘zbekiston Respublikasi hududida bir nechta jamoat birlashmalarini tuzish, ularning faoliyatini tashkil etish va yuritish man etiladi.
Jumladan, jamiyatning axloqiy negizlari, umumbashariy insonparvarlik qadriyatlarini buzishga qaratilgan guruhlar tashkil etish jinoyat hisoblanadi.
Shuningdek, konstitutsion tuzumni g‘ayriqonuniy yo‘l bilan o‘zgartirish yoki O‘zbekiston Respublikasi hududining birligini buzishga qaratilgan, shu qatorda, urushni, zo‘ravonlikni va shafqatsizlikni targ‘ib qiladigan tashkilotlarni tuzish qonunan taqiqlanadi.
Jamiyatni parchalashga olib boradigan ijtimoiy, sinfiy, irqiy, milliy va diniy adovatni avj oldirish, qonun bilan man qilingan boshqa hatti-harakatlarni bajarishni maqsad qilgan jamoat birlashmalarini tuzish ham davlat qonunchiligiga zid hisoblanadi.
Bundan tashqari, harbiylashtirilgan jamoat birlashmalari va qurolli tuzilmalar, diniy xarakterga ega partiyalar, ularning filiallari hamda boshqa struktura bo‘laklari faoliyatiga ham yo‘l qo‘yilmaydi.
Avvalroq “Hizb ut-Tahrir” aʼzolari qo‘lga olingani hamda Toshkentda “Xalifalik” davlatini qurmoqchi bo‘lgan 12 nafar shaxs ushlangani haqida xabar berilgandi.
Olamgir Abdiyev
