Qoraqalpog‘istonda IIVning 3 nafar xodimi ishtirokida YTH ro‘y berdi
Ularning 3 nafari ham vafot etgan.
Bu haqida JIЕD matbuot xizmati xabar bermoqda.
Maʼlum bo‘lishicha, joriy yilning 26 noyabr kuni soat 00.10 larda videoselektor yig‘ilishidan qaytayotgan IIV Jazoni ijro etish departamentining xodimlari Nukus-Qo‘ng‘irot yo‘lida avtohalokatga uchragan.
Qoraqalpog‘iston Respublikasi Xo‘jayli tumani hududidan o‘tuvchi “A-380” “G‘uzor-Buxoro-Nukus-Buyneu” avtomobil yo‘lining 708 kilometrida jazoni ijro etish xizmati xodimi I.I xizmat joyidan xonadoniga qaytayotgan vaqtida o‘ziga tegishli bo‘lgan “Cobalt” avtomashinasini boshqarayotganda, qarama-qarshi tomonlarni ajratib turadigan beton to‘siqqa urilishi oqibatida yo‘l-transport hodisasi sodir bo‘lgan.
Oqibatda, transport vositasida bo‘lgan shaxslar M.X hamda X.X lar og‘ir tan jarohati bilan voqea joyida, I.I esa ko‘rsatilgan tibbiy yordamga qaramasdan Xo‘jayli tuman tibbiyot birlashmasida vafot etgan
Hozirda yuz bergan avtohalokat yuzasidan tergovga qadar tekshiruv ishlari olib borilmoqda.
Eslatib o‘tamiz, avvalroq Qashqadaryo viloyati Qarshi shahri Yangisaroy mahalla fuqarolar yig‘inida yashovchi shaxs boshqaruvidagi “Sobalt” “ZIL”ga urilishi oqibatida YTH sodir bo‘lgani hamda Nukus tumanida Matiz avtomobili yo‘lning qatnov qismida ketayotgan piyodani urib ketgani haqida xabar berilgandi.
Cho‘lponoy Ahmedova
