8 oylik homilador ayolni pichoqlagan shaxs 20 yilga qamaldi
Uni o‘g‘rilik va qotillik sodir etishiga qimorda yutqazilgan pul sabab bo‘lgan.
Bundan bir necha oy avval ijtimoiy tarmoqlarda farg‘onalik 29 yoshli Ulug‘bek Nizomov internetdagi "1xbet" qimor o‘yinlarida katta miqdordagi pulni yutqazib qo‘ygani va uni to‘lash maqsadida qo‘shnisining uyiga o‘g‘rilikka kirib homilador kelinini pichoqlab o‘ldirgani haqida xabar tarqalgan edi.
Mazkur qotillikni sodir etgan fuqaro qo‘lga olinib unga nisbatan jinoiy ish ochilgan edi.
Tergov jarayonlarida maʼlum bo‘lishicha Ulug‘bek Nizomov internet orqali muntazam qimor va tavakkalchilikka asoslangan o‘yinlar o‘ynab kelgan. Natijada 100 million so‘mdan ortiq pul yutqazib, ko‘p miqdorda qarzdor bo‘lib qolgan. Qarzlarini to‘lash uchun qo‘shnisi O.Q.dan 2 ming dollar qarz olgan. Qo‘shnisining yaxshilik qilib pul bergani Ulug‘bekni halovatini buzgan. U qo‘shnimning uyida ko‘p pul borligini taxmin qilib joriy yilning 23 iyun kuni uyiga hech kim yo‘qligida o‘g‘rilikka tushgan. Kutilmaganda uyga qo‘shnisining homilador kelini kelib qoladi. Ulug‘bek Nizomov qilmishi oshkor bo‘lishidan qo‘rqib qo‘shni kelinga pichoq bilan hujum qilgan, tanasining turli sohalariga tan jarohatlari yetkazgan hamda hodisa joyidan yashiringan. Ayol ko‘rsatilgan tibbiy yordamga qaramasdan, olgan tan jarohatlari natijasida shifoxonaning jonlantirish bo‘limida vafot etgan.
2021 yil 23 iyun kuni mazkur holat yuzasidan Yozyovon tuman prokuraturasi tomonidan Ulug‘bek Nizomovga nisbatan Jinoyat kodeksining 97-moddasi 2-qismi "b", “i” bandlari (homiladorligi aybdorga ayon bo‘lgan ayolni tamagirlik niyatida qasddan odam o‘ldirish), 164-moddasi 3-qismi "v", "g" bandlari (uy-joyga, omborxona yoki boshqa binolarga g‘ayriqonuniy ravishda kirgan holda badanga og‘ir shikast yetkazib, bosqinchilik qilish) bilan jinoyat ishi qo‘zg‘atilgan. Jinoyat ishlari bo‘yicha Yozyovon tuman sudi tomonidan qotillikka qo‘l urgan shaxsga sud hukmi bilan 20 yil qamoq jazosi tayinlandi.
Avvalroq Bulung‘urda mast erkak amakisini ketmon bilan jarohatlab, o‘ldirgani hamda Farg‘onada 15-16 yoshli bolalar 45 yoshli taksichini vahshiylarcha o‘ldirib dalaga tashlab ketishgani haqida xabar bergan edik.
Munojat Valiyeva
