“Bivol - Salamov shousi”da yana to‘rtta chempionlik jangi o‘tkaziladi
11 dekabr kuni Rossiyaning Yekaterinburg shahrida “RCC Boxing Promotions” kompaniyasi tomonidan professional boks oqshomi bo‘lib o‘tadi.
Ushbu jang oqshomining asosiy to‘qnashuvi WBA yo‘nalishi bo‘yicha amaldagi jahon chempioni Dmitriy Bivol va Umar Salamov o‘rtasida o‘tkaziladi. Kechaning markaziy janglaridan yana biri WBO reytingining ikkinchi va to‘rtinchi raqamli jangchilari o‘zaro to‘qnash keladi. Unda Magomed Qurbonov va Patrik Teysheyra “WBO International” kamari uchun ringga ko‘tarilishadi.
Mazkur boks oqshomi doirasida yana uchta titul janggi tashkillashtiriladi. Unda Eduard Skavinskiy va Sergey Lobkovich WBC yo‘nalishining yarim o‘rta vazn toifasi chempionligi uchun bahs olib borishadi. Rossiyalik bokschilar Ruslan Komilov va Dmitriy Xasiyev “WBO Inter-Continental” kamari va ikkinchi yengil vazn toifasida jahon boks tashkiloti reytingining kuchli uchligidan joy olish uchun jang qilishadi. Artur Lopsan va Ramil Hajiyev esa o‘rta vazn toifasida “WBO Oriental” chempionlik kamari uchun to‘qnash kelishadi.
Avvalroq Toshkent shahrida professional boks oqshomi o‘tkazilishi va Gennadiy Golovkin va Reta Murataning jang sanasi aniq bo‘lgani haqida xabar berilgandi.
Jamshidbek Amirov
