Rasman! Talaba qizning o‘z joniga qasd qilgani bo‘yicha qo‘shimcha ma’lumot berildi
Mazkur holat yuzasidan Qarshi shahar prokuraturasi tomonidan tergovga qadar tekshiruv harakatlari olib borilmoqda.
Maʼlum bo‘lishicha, 30 noyabr kuni soat 19.00larda Qarshi shahrida joylashgan “Abu Ali ibn Sino” nomidagi jamoat salomatligi texnikumining yotoqxonasida istiqomat qilgan 2-bosqichda o‘qigan 2001 yilda tug‘ilgan talaba qiz yotoqxonaning 4-qavatidan sakrab o‘z joniga qasd qilgan.
O‘z joniga qasd qilmoqchi bo‘lgan qiz Chiroqchi tumanidan bo‘lgan. Bundan tashqari u opasi bilan yotoqxonaning bir xonasida yashagan. Shuningdek, marhuma hamshiralik yo‘nalishida tahsil olgan.
Hozirda o‘lim sabablari va ishga aloqador bo‘lgan boshqa holatlarga aniqlik kiritish maqsadida sud-tibbiy ekspertizasi tayinlangan hamda ishga aloqador bo‘lgan shaxslardan tushuntirish xatlari olinmoqda.
Eslatib o‘tamiz, avvalroq Jizzaxda mahkum tanishini pichoqlab, o‘z joniga qasd qilgani hamda Toshkentda “zamdekan” talaba qizni uchinchi qavatdan itarib yuborgani haqida xabar berilgandi.
Cho‘lponoy Ahmedova tayyorladi
