Oliy taʼlim muassasalarida dars vaqtini qisqartirish taklif etildi
Talabalarning ko‘pchiligi bu taklifni qo‘llab-quvvatlamoqda.
Yoshlarforumi.uz platformasida oliy taʼlim muassasalaridagi dars vaqtini qisqartirish taklif qilindi. Muallifning fikricha, dars soatlarini qisqartirish talabalarning foydali ish koeffitsiyentini oshiradi.
“Oliy taʼlim muassasalarida 1 para dars 80 minutga to‘g‘ri keladi. Maʼruza darslarida o‘qituvchilar dars o‘tishadi. Talabalar shu maʼruzaga uzog‘i bilan 40-50 daqiqa diqqatini jamlay oladi, xolos. Natijada maʼruzaning qolgan qismini talabaning miyasi qabul qilmay qoladi. Bu tabiiy holat: inson miyasining tuzilishi shunaqa. Taklifim shundan iboratki, 1 para darsni 80 daqiqa emas, 45-50 daqiqagacha tushirish kerak. Fikri ojizimcha, bu yo‘l o‘zini oqlaydi. Chunki 2020/2021-o‘quv yilining noyabr-dekabr oylarida pandemiya sababli darslar xuddi shunaqa 45 minutgacha qisqartirilgandi. Buni agar hozirgi holat bilan solishtiradigan bo‘lsak, o‘sha vaqtda talabaning foydali ish koeffitsiyenti yuqoriroq bo‘lgan deb o‘ylayman”.
Hozirgi vaqtga qadar platformada mazkur taklifni qo‘llab-quvvatlovchilar 75 foizni, aksincha fikr bildirganlar 25 foizni tashkil etdi.
Eslatib o‘tamiz, biroz avval Yoshlar ishlari agentligi direktori o‘zining rasmiy telegram sahifasida Yoshlar forumi yakunlari bo‘yicha hukumat qarori qabul qilinishi, bu qarorda ayni shu kabi takliflar aks etishi mumkinligini bayon qilib, barchani platforma orqali o‘z g‘oyalari va muammolarini yozib qoldirishga chaqirgan edi.
Javohirbek Tursunov
