O‘zbekiston SHHTga raisligi davrida asosan qaysi yo‘nalishlarga eʼtibor qaratadi?
2022 yil 1 yanvardan boshlab tashkilotga raislik Toshkentga o‘tdi.
2022 yil SHHTga boshchilik qiladigan O‘zbekiston 80 dan ortiq xalqaro tadbirlar o‘tkazishni rejalashtirmoqda. Bu haqda "TASS" maʼlum qildi.
Toshkent tashkilot doirаsida iqtisodiy hamkorlikni kuchaytirish hamda uning xavfsizlik sohasidagi salohiyatini mustahkamlashni ustuvor yo‘nalishlar sifatida belgilab olgan. Shu bilan birga raqamli texnologiyalar va innovatsiyalarni rivojlantirish mexanizmlarini yaratish orqali SHHT kun tartibini kengaytirish ko‘zda tutilmoqda. Bundan tashqari, рandemiya davom etayotgan bir sharoitda sog‘liqni saqlash yo‘nalishida muloqotni davom ettirish dolzarbligicha qolgan.
O‘zbekiston hukumati tashkilotga rahbarlik qilish davri uchun maxsus “yo‘l xaritasi” va konsepsiya ishlab chiqqan.
“SHHTning O‘zbekiston raisligi doirasida bo‘lib o‘tadigan barcha tadbirlari eng yuqori darajada o‘tkazilishiga hech qanday shubha yo‘q”, – deya taʼkidlagan O‘zbekiston tashqi ishlar vaziri Abldulaziz Komilov.
SHHTga aʼzo davlatlar rahbarlarining navbatdagi uchrashuvi 2022 yil 15-16 sentyabr kunlari bo‘lib o‘tadi. Komilovning so‘zlariga ko‘ra, bu uchrashuv tashkilot salohiyatini amalga tadbiq qilishga yangi imkoniyatlar ochadi, uning roli va ahamiyatini mustahkamlaydi.
Avvalroq Shavkat Mirziyoyev mamlakatimizning SHHTdagi raisligidagi ustuvor vazifalarini bayon qilgani hamda 2022 yilda SHHT-Afg‘oniston oliy darajadagi uchrashuvi tashkil etilishi mumkinligi to‘g‘risida xabar qilingandi.
Jahongir Qo'ziyev
