Namanganda 35 yoshli erkak sinfdoshini pichoqladi
Birlamchi maʼlumotlarga ko‘ra, fuqaro mast holatda bo'lgan.
Namangan viloyati Uychi tumanida 30-yanvar kuni fuqaro sinfdoshini kurakda turmaydigan gaplari uchun pichoqladi, deb xabar bermoqda Tergov departamenti.
Qayd etilishicha, shu kuni J.I. ismli fuqaro (1987-yilda tug‘ilgan) Hamzaobod ko‘chasida joylashgan sinfdoshi N.D.ning uyiga borgan. Uni yashash xonadonidan chiqarib, janjallashgan.
Shu payt N.D. boshi bilan J.I.ning yuziga urgan. J.I. esa o‘zida bo‘lgan oshxona pichog‘i bilan sinfdoshining chap yonbosh qorin sohasiga bir marta urib, tan jarohati yetkazgan va voqea joyidan yashiringan.
Tuman tibbiyot birlashmasining birlamchi tibbiy maʼlumotnomasiga ko‘ra, N.D.ning chap yonbosh sohasidan qorin bo‘shlig‘iga kirib boruvchi kesilgan sanchilgan jarohati bor bo‘lib, ushbu jarohat hayot uchun xavfli bo‘lgan og‘ir turdagi jarohatlar sirasiga kiradi.
Tergov davomida jinoyatning kelib chiqish sababi aniqlanganda, 30 yanvar kuni gumonlanuvchi, jabrlanuvchi hamda ularning yana 7 nafar sinfdoshi “Oqtosh” mahallasi hududida joylashgan kafelarning birida spirtli ichimliklar isteʼmol qilib o‘tirgani, shu vaqtda N.D. sinfdoshi J.I.ning shaxsiyatiga tegib, haqorat qilgan. O‘tirish tugaganidan so‘ng, J.I. sinfdoshi N.D.ning uyiga borib yuqoridagi holatni vujudga keltirgani maʼlum bo‘lgan.
Holat yuzasidan J.I.ga nisbatan Jinoyat kodeksning 104-moddasi (qasddan badanga og‘ir shikast yetkazish) 2-qismi “l” bandi bilan jinoyat ishi qo‘zg‘atilib, u protsessual tartibida ushlangan. Hozirda dastlabki tergov harakatlari olib borilmoqda.
Eslatib o‘tamiz, avvalroq Namanganlik ayol tunda bosqinchilarga duch kelgani hamda qaynuka pochchasidan qasd olish uchun uning akasini pichoqlagani haqida xabar berilgandi.
Cho‘lponoy Ahmedova tayyorladi.
