Qarshi davlat universitetidagi qoidabuzarlarga chora ko‘rildi
Bu bo‘yicha jinoiy ish universitetdagi ko‘plab daraxtlarning kesilgani yuzasidan ochilgan.
Qashqadaryo viloyati Qarshi davlat universitetida 38 tup daraxt noqonuniy kesib tashlangani haqida xabar berilgandi. Bosh prokuratura holat yuzasidan qo‘shimcha maʼlumot berdi.
Unga ko‘ra, universitetning 6 nafar masʼul xodimiga nisbatan Maʼmuriy javobgarlik to‘g‘risidagi kodeksning 79-moddasi (Daraxtlarni, butalarni, boshqa o‘simliklarni va nihollarni qonunga xilof ravishda kesish, kundakov qilish, shikastlantirish, yo‘q qilish yoki boshqa joyga ko‘chirib o‘tkazish) 1-qismi bilan maʼmuriy javobgarlikka oid ish qo‘zg‘atilgan.
Aniqlanishicha, ushbu holatda tabiatga 285 million so‘m miqdorida zarar yetkazilgan.
Maʼlumot uchun: 13–15 yanvar kunlari Ekologiya qo‘mitasining davlat inspektorlari tomonidan daraxt kesib tashlangan joyda o‘rganish ishlari olib borilgan. Universitet tomonidan Yagona davlat interaktiv xizmatlari portali orqali davlat o‘rmon fondiga kirmaydigan daraxtlarni kesish uchun uch marotaba murojaat qilingan va bu to‘g‘risida rad javobini olgan.
Qayd etilishicha, Ekologiya va atrof-muhitni muhofaza qilish boshqarmasi tomonidan rad javobi berilganiga qaramasdan, jami 38 tup daraxt noqonuniy kesilgan. Huquqbuzarlikka aloqador shaxslardan tushuntirish xatlari olindi.
Mazkur qonunbuzarlik holati bo‘yicha o‘simlik dunyosiga yetkazilgan zarar 267 million 543 ming so‘m miqdorida hisoblandi. Hodisaga oid materiallar huquqni muhofaza qilish organlariga taqdim etilgan.
