Qoraqalpog‘istonda qurilish sohasida 30 milliard so‘m talon-taroj qilingan
Zarur mablag‘lar davlat byudjetidan ajratilganiga qaramay, rejalashtirilgan ishlar o‘z vaqtida yakuniga yetmagan.
"2018-yildagi investitsiyaviy va infratuzulmaviy loyihalar ro‘yxatini tasdiqlash to‘g‘risida" Prezident qaroriga muvofiq, 2018-2021 yillarda Nukus davlat pedagogika institutining o‘quv binolarini yangidan qurish va rekonstruksiya qilish uchun 54,3 milliard so‘m ajratilishi rejalashtirilgan.
Bu haqda DXX xabar berdi
2018-yilda o‘tkazilgan tenderda "Jayhun Universal Qurilish" MCHJ g‘olib chiqqan. Pudratchi tomonidan 2021 yilning sentyabr oyiga qadar barcha ishlar amalga oshirilishi kerak bo‘lgan. Biroq zarur mablag‘lar davlat byudjetidan ajratilganiga qaramay, rejalashtirilgan ishlar belgilangan muddatda yakuniga yetmagan.
Aniqlanishicha, pudratchi "Jayhun Universal Qurilish" MCHJ va buyurtmachi Qoraqalpog‘iston Respublikasi Vazirlar Kengashining "Yagona buyurtmachi xizmati" injiniring kompaniyasi mansabdor shaxslari o‘zaro til biriktirib, tegishli hujjatlarni soxtalashtirgan. Firibgarlik yo‘li bilan ular 12,7 milliard so‘m miqdordagi pul mablag‘larini talon-taroj qilgan.
Ushbu holat yuzasidan mansabdor shaxslarga nisbatan Jinoyat Kodeksining 167 va 209-moddalari bilan jinoyat ishi qo‘zg‘atilgan. Hozirda tergov harakatlari olib borilmoqda.
Boshqa holatda esa buyurtmachi "Qishloq qurilish invest" MCHJ injiniring kompaniyasi Qoraqalpog‘iston filiali va 7 ta pudratchi tashkilotlar mansabdor shaxslari o‘zaro til biriktirib, 2020-yilda Qoraqalpog‘istonda ko‘p qavatli uy-joylar qurish uchun ajratilgan byudjet mablag‘ining 17,5 milliard so‘mini talon-taroj qilgani aniqlandi.
Hozirda mazkur holat yuzasidan ham qo‘zg‘atilgan jinoyat ishi doirasida tergov harakatlari olib borilmoqda.
Eslatib o‘tamiz, avvalroq shirkatlar tomonidan 1 milliard 809 million so‘m talon-taroj qilingani aniqlangandi.
