Navoiyda tarbiyachilar "podezd" yuvdi
Shahar maktabgacha taʼlim bo‘limi boshlig‘i Mavluda Tursunova “start” buyrug‘ini hokim berganini bildirgan.
Ijtimoiy tarmoqlarda Zarafshon shahrida tarbiyachilar ko‘p qavatli uylarning podezdlarini yuvishga jalb qilingani to‘g‘risida xabarlar tarqaldi.
Navoiy viloyati Bandlik bosh boshqarmasining maʼlum qilishicha mazkur holat Davlat mehnat inspeksiyasi tomonidan o‘rganilgan.
Aniqlanishicha, fuqarolar ko‘p qavatli uylarning zinapoyalarini tozalash ishlariga majburiy jalb etilgan. Zarafshon shahar maktabgacha taʼlim bo‘limi mudiriga Maʼmuriy javobgarlik to‘g‘risidagi kodeksning 51-moddasiga (mehnatga maʼmuriy tarzda majburlash) asosan maʼmuriy jarima qo‘llangan.
Taʼkidlanishicha, xodimlarning mehnat huquqlarini himoya qilish hamda qonun buzilishlarning oldini olish bo‘yicha tegishli ishlar amalga oshirilmoqda.
Maktabgacha taʼlim bo‘limi boshlig‘i o‘zining Telegram guruhda bog‘cha rahbarlariga hokim shunday topshiriq berganini maʼlum qilgan.
“Hurmatli direktorlar. Meni hozir hokim chaqirdi, podyezd masalasida qattiq gap eshitdim. Hozirdan nazoratga oling, ertaga har bir MTT 20 tadan rasm tashlashi shart. Bugun 17-sonli MTT bu masalada qattiq tanqidga olindi. Har kuni o‘zingiz boshchiligida ushbu masalani uyushqoqlik bilan tashkil eting. Ertaga (hokim) 11-kichik tumandagi 20- yoki 9-sonli MTTga borishi mumkin. Rahbarga birinchi savol podyezdni yuvdingizmi, deb beriladi. Barcha MTTlarga navbat bilan borildi”, – deya taʼkidlagan Mavluda Tursunova o‘z topshirig‘ida.
