Buxoroda "Talipoch qalʼa darvozasi" devorining bir qismi qulab tushdi
Yodgorlik XVI asrga tegishli bo‘lgan.
Joriy yilning 11 mart kuni kechki payt viloyatda hafta davomida ob-havoning mutasil yog‘ingarchilik kuzatilgani oqibatida Buxoro shahridagi “Talipoch qalʼa darvozasi” chap tomonidagi qalʼa devorining bir qismi qulab tushgan.
Bu haqda Buxoro viloyat madaniy meroc boshqarmasi matbuot xizmati xabar berdi.
Holat yuzasidan, 12 mart kuni viloyat Buxoro viloyati hokimligi, Madaniy meros hamda Favqulodda vaziyatlar boshqarmalari, Buxoro mintaqaviy restavratsiya markazi masʼul xodimlari va boshqarmaning maxsus eskspertlaridan iborat Jamoatchilik Ilmiy maslahat kengashi aʼzolari ishtirokida joyida o‘rganish ishlari olib borildi.
Unga ko‘ra, “Talipoch qalʼa darvozasi”ning ushbu qismi 2003 yilda qayta tiklangan bo‘lib, o‘tgan yillar davomida qalʼa atrofidagi devorning chap qanoti ortidagi madaniy qatlamlarning cho‘kishi, qoplama devorlarida yoriqlar paydo bo‘lishi hamda joriy mart oyida kuzatilgan doimiy yog‘ingarchilik devorning cho‘kishi va qulab tushishiga olib kelganligi aniqlandi.
Shu o‘rinda, “Talipoch qalʼa darvozasi” joriy yil davomida asrashga doir ishlar amalga oshiriladigan moddiy madaniy meros ko‘chmas mulk obyektlarining manzilli ro‘yxatiga kiritilgan.
Hozirda sohaga tegishli rahbarlar va mutaxassislar tomonidan mazkur obyektning atrofini o‘rab olish, mazkur huddudda yashovchi fuqarolar va obyektga tashrif buyuruvchi sayyohlar xavfsizligini taʼminlash choralari ko‘rildi.
Shuningdek, viloyat hokimligi va ekspertlar tomonidan obyektning texnik holati o‘rganilib, uni tez fursatda qayta tiklash choralarini ko‘rish borasidagi tegishli ishlar olib borilmoqda.
