Qashqadaryoda "Tavhid va Jihod katibasi" ga qo‘shilmoqchi bo‘lgan guruh ushlandi
Guruh aʼzolari orasida MCHJ rahbari va talaba ham bor.
Bu haqda DXX matbuot xizmati xabar bermoqda.
Qarshi shahrida yashovchi 52 yoshli fuqaro muqaddam “Jihodchilar” diniy ekstremistik oqimiga aʼzo bo‘lganligi uchun 2004 — 2018 yillarda jazo muddatini o‘tagan bo‘lishiga qaramasdan, o‘zining yashash manzilida 1994, 1996, 1998 yillarda tug‘ilgan 3 nafar farzandi va 2000 yilda tug‘ilgan jiyani hamda 1974-1998 yillar orasida tug‘ilgan 11 nafar mahalliy fuqarolardan iborat noqonuniy guruh tashkil etib, “jihodchilar” oqimi g‘oyalarini qo‘llab-quvvatlab kelgan.
Ular “Telegram” messenjerida “Shahidlar” nomli guruh tashkil etib, unga diniy ekstremistik oqimlar va terroristik tashkilotlarning g‘oyaviy rahnamolari bo‘lmish "Abu Saloh", "Abdulloh Zufar", "Sodiq Samarqandiy" va boshqalarning “hijrat”, “jihod” va “shahidlik”ka chorlovchi audio-video materiallarini joylashtirib, targ‘ibot ishlari olib borgan.Shuningdek, guruh aʼzolari “hijrat” va “jihod” qilishga ham uringan.
Davlat xavfsizlik xizmati Qashqadaryo viloyati boshqarmasi va viloyat ichki ishlar boshqarmasi tomonidan mazkur noqonuniy guruh faoliyatiga chek qo‘yildi.
Dastlabki tergov-surishtiruv jarayonlarida aniqlanishicha, guruh yetakchisining ko‘rsatmasi bilan uning aʼzolari bosqinchilik jinoyatlarini sodir etish orqali yo‘l xarajatlari uchun pul yig‘ish, so‘ngra Suriyaga borib, terroristik tashkilotlar safiga qo‘shilishni rejalashtirgan.
Hozirda mazkur holat yuzasidan Jinoyat Kodeksining tegishli moddasiga asosan jinoyat ishi qo‘zg‘atilib, tergov harakatlari olib borilmoqda.
Eslatib o‘tamiz, avvalroq Camarqandda 10 nafar terrorchi tashkilot tarafdorlari ushlangani haqida xabar berilgandi.
