So‘nggi 5 yilda majburiy mehnatga qarshi qaratilgan 32 normativ-huquqiy hujjat qabul qilindi
Senatning yigirma to‘rtinchi yalpi majlisi boshlandi. Tanzila Norboyeva paxtaga qo‘yilgan boykotning bekor qilinishiga munosabat bildirdi.
“Majburiy mehnat masalasiga eʼtibor berilmagani ortidan 2009 yilda “Cotton Campaign” xalqaro koalitsiyasi O‘zbekiston paxtasiga boykot eʼlon qilgandi. Oqibatda, 330 dan ortiq yirik kompaniyalar bu taqiqqa amal qilib keldi. O‘zbekiston katta salohiyat va imkoniyatga ega bo‘lsa-da, 13 yil davomida biz bu boykotdan aziyat chekib keldik”, — deb qayd etdi Senat raisi.
Uning so‘zlariga ko‘ra, so‘nggi yillarda majburiy mehnatni butunlay yo‘q qilishga qaratilgan katta ishlar amalga oshirildi. Xususan, eng avvalo, katta siyosiy iroda ko‘rsatildi. Ikkinchidan, qonunchilik bazasi mustahkamlandi. Norboyeva so‘nggi 5 yilda majburiy mehnatga qarshi qaratilgan 32 normativ-huquqiy hujjat qabul qilinganini maʼlum qildi.
Tanzila Norboyeva boykotning bekor qilinishi katta ahamiyatga ega ekanini taʼkidladi. Senat rahbari majburiy mehnat va odam savdosiga qarshi kurashda faol yordami uchun vazirliklar, fuqarolik jamiyati faollari, jurnalist va blogerlarga minnatdorlik bildirdi.
Senatning yigirma to‘rtinchi yalpi majlisi davom etmoqda.
