Benzema “El-Klassiko”ni o‘tkazib yuborishi mumkin
Fransiyalik futbolchi “Barselona”ga qarshi o‘yin oldidan mashg‘ulotlarda qatnashmadi.
Madridning “Real” klubi hujumchisi Karim Benzema “Barselona”ga qarshi 29-tur o‘yini oldidan jamoaviy yig‘inni o‘tkazib yubordi. Bu haqda jurnalist Xose Luis Sanches o‘zining Twitter sahifasida ma’lum qildi.
Manbaning xabariga ko‘ra, fransiyalik hujumchi hali ham mushaklarida noqulaylik his qilmoqda. Benzemaning Kataloniya klubi bilan o‘yinda ishtirok etishi hamon so‘roq ostida.
Ispaniya chempionatining 2021-2022 yilgi mavsumi 29-turidan o‘rin olgan “Real Madrid” – “Barselona” uchrashuvi ertaga, Madriddagi “Santyago Bernabeu” stadionida bo‘lib o‘tadi. Madridning Real klubi 28 o‘yinda 66 ochko jamg‘arib, Ispaniya chempionati turnir jadvalida 1-o‘rinni egallab turibdi. “Barselona” esa 51 ochko bilan 3-o‘rinda bormoqda.
Avvalroq, tinib-tinchimas parijliklar Benzemani qo‘lga kiritmoqchi ekanligi va Gared Beylning jismoniy holati haqida xabar berilgandi.
