Navro‘z dasturxonidan tanovul qilishda nimalarga eʼtibor berish kerak?
SSV bu bo‘yicha aholiga murojaat bilan chiqdi
Navro‘z dasturxonidan tanovul qilishda nimalarga eʼtibor berish kerak?
Navro‘z bayrami arafasida ayollar bahoriy ayyom dasturxonini qanday taomlar bilan to‘ldirish haqida bosh qotirayotgani sir emas. Ushbu ayyomda to‘g‘ri ovqatlanish katta ahamiyat kasb etadi? Bu borada nimalarga amal qilish kerak? Sog‘liqni saqlash vazirligi ushbu masala yuzasidan maslahat berdi.
Inson sog‘lig‘i ovqatlanishning alohida tarkibiga, mahsulotlar va taomlarning sifatiga bevosita bog‘liq bo‘ladi. To‘g‘ri ovqatlanish barcha maʼlum bo‘lgan kasallik holatlarining 80 foizining oldini olishda ahamiyatlidir.
Navro‘z ayyomi kunlarida xalqimiz ko‘klamga yetganlik shukronasi sifatida, mahallalarda bayram sayllari o‘tkazish taraddudida bo‘ladi. Shu kunlarda dasturxonga ko‘klam taomlarni bilan birgalikda o‘nlab turdagi yeguliklar, taomlar, pishiriqlar va shirinliklar qo‘yiladi. Bu esa bahorgi holsizlik bilan yuzma-yuz turgan inson organizmi uchun ancha og‘irlik qilishi turgan gap.
Ovqat to‘liq hazm bo‘lmasdan turib, yana taom yeyilsa, hazm jarayoni og‘irlashadi. Chunki oshqozonda ovqat ustiga yana taom tushishi shira aralashish meʼyorini buzadi. Bu o‘z o‘rnida kishida qorin g‘uldirashi, dam bo‘lishi va lohaslik kabi holatlarning paydo bo‘lishiga sabab bo‘ladi.
Maʼlumki, meʼda ovqatga to‘lib ketsa, uning harakat funksiyasi yomonlashadi, natijada oshqozondagi oziq moddalarning shira bilan aralashishi qiyinlashib, hazm jarayoni izdan chiqadi.
Agar qorin to‘yishiga oz qolganda ovqatdan qo‘l tortilsa, kishi hazm aʼzolarining ishi yengillashadi, odam o‘zini yaxshi his qiladi va keyingi ovqatlanishga ishtaha saqlaydi.
Demak, bayram kunlarida noxush holatlarga barham berish uchun, avvalo, ovqat isteʼmol qilish tartibiga rioya qilish lozim. Kun davomida sabzavotli salatlar, oshko‘klar, ho‘l mevalardan, ko‘klam neʼmatlaridan oz-ozdan isteʼmol qilingani maʼqul.
Tabiiy mahsulotlar ko‘proq yeyilganda 50 foiz hollarda hazm qilish aʼzolari yaxshi ishlaydi. Natijada meʼda-ichaklar ishi osonlashib, organizmning ovqat hazmiga sarflanadigan energiyasi birmuncha tejaladi.
