Andijonda o‘qituvchi o‘quvchi qizni kaltakladi

 

Ijtimoiy tarmoqlarda “Andijondagi maktabda o‘qituvchi o‘quvchi qizni kaltakladi, o‘quvchi qiz esa o‘zini himoyalash uchun o‘qituvchiga qarshilik ko‘rsatdi” sarlavhasi bilan tarqalgan videoxabar Andijon viloyati IIB tomonidan o‘rganilmoqda. 

 

Xabarga ko‘ra, joriy yilning 5-aprel kuni ijtimoiy tarmoqlarda Asaka tumani 38-umumtaʼlim maktabi to‘g‘risida tarqalgan videotasvirlar yuzasidan Asaka tumani hokimligi hamda tuman xalq taʼlimi bo‘limi tomonidan ishchi guruh tuzilib o‘rganish ishlari olib borilgan.

 

Tarqalgan videotasvirlardagi holat joriy yilning 2-aprel kuni dars tugashi paytida 10-“A” sinfida sodir bo‘lgan va o‘qituvchi va o‘quvchilar o‘rtasida o‘zaro kelishmovchilik yuzaga kelgan. Bunga o‘quvchilarning hech qanday sabablarsiz ketma-ket ikki kun darsdan qochib ketishi va dars jarayonlariga qatnashmayotgani sabab bo‘lgan.

 

Ushbu holatdan so‘ng o‘rganish davomida tuman hokimligi hamda xalq taʼlimi bo‘limi ishchi guruhi va maktab maʼmuriyati bilan birgalikda holatga oydinlik kiritilib, o‘qituvchi R.D. va o‘quvchilar I.S., M.M., Sh.Z., va B.O‘. murosaga keltirilgan. Ayni paytda ular o‘rtasida hech qanday adovat mavjud emas. O‘qituvchi ishchi guruh tomonidan ham odob-axloq normalariga qatʼiy rioya qilishi to‘g‘risida jiddiy ogohlantirilgan. Kelgusida bunday holatga yo‘l qo‘ymaslik xar qanday masalani vazminlik bilan hal etilishi to‘g‘risida tushuntirish ishlari olib borilgan.

 

Taʼkidlanishicha, o‘quvchilarning ota-onalari bilan ham suxbat olib borilib, farzandlarini doimiy dars jarayonlariga qatnashishini nazorat qilishlari to‘g‘risidan tushunchalar berilgan.

 

“Asaka tumani hokimligi o‘quvchilarning ota-onalaridan, Prezidentimiz tomonidan ustoz qadrini ulug‘lash borasida olib borilayotgan islohotlarga hamoxang tarzda o‘z farzandlarini maktabdagi dars jarayonlarida muntazam qatnashishlari va odob-ahloq qoidalariga rioya etishlarini nazorat qilib borishlarini so‘rab qoladi”, — deyiladi xabarda.