Krishtianu Ronaldu muxlisning telefonini sindirib, undan uzr so‘radi
Hodisaga “Everton” jamoasi bilan o‘yindagi mag‘lubiyat sabab bo‘lgan.
“Manchester Yunayted” futbolchisi Krishtianu Ronaldu “Everton” bilan o‘yindagi mag‘lubiyatdan so‘ng muxlisning telefonini yerga urib sindirdi.
Hodisa APLning 32-turidan o‘rin olgan “Manchester Yunayted” – “Everton” uchrashuvidan so‘ng yuz bergan. Portugaliyalik futbolchi maydonni tark etayotganda tribuna yonidagi yo‘lakchaga muxlisga teshishli telefonni uloqtirgan.
Shundan so‘ng Ronaldu o‘z Instagram sahifasida muxlisdan uzr so‘ragan.
“Hozirgi og‘ir damlarda hissiyotlar bilan kurashish qiyin. Nima bo‘lgan taqdirda ham, hurmat bilan, sabrli bo‘lib, chiroyli o‘yinimizni yoqtiradigan yoshlarga o‘rnak bo‘lishimiz lozim.
Men qilgan ishim uchun uzr so‘rayman. Iloji bo‘lsa, halollik va sport tamoyillari belgisi sifatida ushbu muxlisni “Old Trafford”dagi o‘yinga taklif qilaman”, — deya post qolirgan futbolchi.
