Andijondagi bog‘chada 4 yoshli bola vafot etdi
Uyquga yotib qayta uyg‘onmagan bolaning o‘lim sababi noma’lum.
Maktabgacha ta’lim vazirligi Axborot xizmati xabar berishicha, kecha soat 14-00dan 15-00ga qadar bo‘lgan oraliqdagi vaqtda Andijon viloyati, Oltinko‘l tumanidagi 31-sonli davlat maktabgacha ta’lim tashkilotida tarbiyalanayotgan 4 yoshli Lutfullayev Xushnudbek maktabgacha ta’lim tashkilotining kun tartibidagi uyqu vaqtida uxlayotganda olamdan o‘tgan.
Tashkilot hamshirasining so‘zlariga ko‘ra, ertalabki qabul jarayonida tarbiyalanuvchi Lutfullayev Xushnudbekda hech qanday kasallik alomatlari kuzatilmagan.
Kun tartibidagi uyqu vaqtida har doimgidek bolalar uyquga yotqizilgan. Tarbiyachi tomonidan tarbiyalanuvchilarni uyqudan uyg‘otilganda bola o‘rnidan turmagan. Shundan so‘ng MTT xodimlari darhol tez yordamga murojaat qilingan. Tibbiyot xodimlari tomonidan tarbiyalanuvchi tibbiy nazoratdan o‘tkazilganda 4 yoshli Xushnudbekning uyqu vaqtida olamdan o‘tganligi ma’lum bo‘lgan.
Hozirgi voqea yuzasidan huquq-tartibot organlari tomonidan surishtiruv, ekspertiza ishlari olib borilmoqda.
