Farg‘onada o‘quvchi qiz nega o‘zini derazadan tashladi?

 

Farg‘ona viloyati xalq taʼlimi boshqarmasi Qo‘shtepa tumanidagi 22-maktab o‘quvchisi o‘qituvchi bilan janjallashib, derazadan sakrab tushgani aks etgan videoga munosabat bildirdi.
 

Maʼlum bo‘lishicha, video ijtimoiy tarmoqlarda bir kun avval tarqalgan va foydalanuvchilar qiz ikkinchi qavatdan sakraganini taxmin qilishgan. Videoda o‘qituvchi qizni urishadi, uning yuziga uradi, jim turishi uchun baqirib, baho qo‘ymasligini aytadi. Shundan so‘ng maktab o‘quvchisi derazadan sakrab tushganidan keyin o‘qituvchi uning ota-onasini so‘kadi.
 

Farg‘ona viloyati XTB o‘z bayonotida 8-sinf o‘quvchisi o‘qituvchisidan kimyo darsi vaqtida kalitni uyiga tashab kelish uchun ruxsat so‘ragani aytilgan. O‘qituvchi dars tugashiga 5 daqiqa qolganini aytgan. Shunga qaramay, qiz sinfdan deraza orqali chiqib ketgan. O‘qituvchi uni yana sinf xonasiga olib kirib tanbeh bergan, biroq o‘quvchi qiz yana derazadan qochib ketgan.
 

Voqea qizning sinfdoshi tomonidan suratga olingan. Sinf birinchi qavatda joylashgan. Maktab o‘quvchisi hech qanday jarohat olmagan, deyiladi xabarda.

Farg‘ona viloyati XTB mazkur holat nazoratga olinganini, o‘rganish davom etayotganini va natijasi bo‘yicha maʼlumot berilishini aytgan.