Farg‘onadagi bog‘chada xo‘jalik mudiri bolalar haqqini yeb yubordi
U avval bolalar uchun ajratilgan oziq-ovqat, so‘ngra bog‘cha mulkini o‘zlashtirish va rastrata qilish yo‘li bilan talon-taroj qilgan.
M.Bozorova Bag‘dod tumanidagi 40-sonli davlat maktabgacha taʼlim tashkilotida xo‘jalik ishlari bo‘yicha direktor o‘rinbosari lavozimida ishlagan. Afsuski, u halol ishlash o‘rniga o‘zgalarning haqqiga ega chiqib, daromad ko‘rmoqchi bo‘ldi.
Dastlab oziq-ovqat mahsulotlarini taomnomalarga asosan chiqarilgan xarajatlarga nisbatan hisobotlarda asossiz ravishda oshirib ko‘rsatib, mablag‘larni talon-taroj qilgan. Shuningdek, u bu ishlarni davom ettirib, hujjatlarga soxta maʼlumotlar kiritadi. O‘ziga ishonib topshirilgan va ixtiyorida bo‘lgan tashkilotning 140 million so‘mdan ortiq mulkini o‘zlashtirish va rastrata qilish yo‘li bilan talon-toroj qilib yuborgan.
Nafsi hakalak otgan opa o‘g‘lining nomiga qurilish-taʼmirlash ishlariga ixtisoslashgan jamiyat ochib, byudjet mablag‘larini o‘zlashtirishni maqsad qiladi. M.Bozorova o‘zi ishlaydigan maktabgacha taʼlim tashkilotida 2018-2021 yillarda amalga oshirilgan joriy taʼmirlash ishlariga soxta hujjatlar tayyorlab, amalda qilinmagan 72 million 633 ming so‘mni o‘zlashtirishga erishadi. Bundan tashqari, u moddiy javobgarligi ostida bo‘lgan oziq-ovqat mahsulotlarini ham o‘zlashtirgani maʼlum bo‘ldi.
Jinoyat ishlari bo‘yicha Bag‘dod tuman sudi tomonidan mazkur jinoyat ishi ko‘rib chiqilib, sudlanuvchiga nisbatan ozodlikni cheklash jazosi tayinlandi. Jinoyat oqibatida yetkazilgan zararni qoplash maqsadida to‘langan pullar davlat foydasiga o‘tkazildi.
