Muhammad Saloh Premyer-ligada eng ko‘p maosh oluvchi futbolchiga aylandi
Bu borada u Ronalduni ham ortda qoldirdi.
“Liverpul” hujumchisi Muhammad Saloh Angliya premyer-ligasida eng ko‘p maosh oluvchi futbolchiga aylandi. Bu haqda “Daily Mail” nashri xabar berdi.
1 iyul kuni “Liverpul” misrlik futbolchi bilan yangi shartnoma imzolaganini e’lon qildi. Shartnoma bo‘yicha uning maoshi haftasiga 400 ming funtni tashkil qiladi.
Bu maosh Premyer-ligadagi yulduz futbolchilar, jumladan, “Manchester Yunayted” hujumchisi Krishtianu Ronaldu va “Manchester Siti” yarim himoyachisi Kevin De Bryuynening maoshidan ham ko‘p.
Saloh dunyodagi eng ko‘p maosh oluvchi futbolchilardan biri. Maosh bo‘yicha u “PSJ” yulduzlaridan keyingi o‘rinda turadi: Lionel Messi, Kilian Mbappe va Neymar.
Eslatib o‘tamiz, misrlik futbolchi 2017 yildan buyon “Liverpul”da o‘ynab kelmoqda. Transfermarkt portali futbolchining narxini 90 million yevroga baholamoqda.
