Ayrimlar qanchalik harakat qilmasin, xalqlarimiz birligiga raxna sola olishmadi — Norboyeva
Senat raisi Qoraqalpog‘istondagi hodisalarga munosabat bildirdi
Bugun Oliy Majlis Senatining yigirma sakkizinchi yalpi majlisi bo‘lib o‘tmoqda. Majlisning kirish qismida Senat raisi Tanzila Norboyeva Qoraqalpog‘istondagi voqealari haqida gapirdi.
"Qoraqalpog‘istonda ayrim nohush xodisalar sodir bo‘lganidan ham barchangizning xabaringiz bor. Ayrim kuchlarning qanchalik harakat qilishiga qaramasdan bo‘lib o‘tgan bu hodisalar hech qachon xalqimizning birdamligiga raxna sola olmasligiga guvohi bo‘ldik.
Shu bilan birga sodir bo‘lgan bu holatda hammamiz o‘zimizga to‘g‘ri xulosa chiqarishimiz va o‘z ishimizni qayta ko‘rib chiqishimiz lozim bo‘ladi. Kuni kecha Prezidentimiz huzurida bo‘lib o‘tgan yig‘ilishda Davlatimiz rahbari ham bu masalaga alohida eʼtibor qaratdi.
Avvalo bu voqealar barcha masalalar xalq bilan hamnafas tarzda va o‘z vaqtida yechilishiga barcha davlat organlari va idoralarining kuchi va resurslarini jalb qilish zarurligini ko‘rsatmoqda.
Shuningdek, aholi tomonidan ko‘tarilayotgan muammo hamda masalaning katta va kichigi bo‘lmaydi. Ularning har birini yechimi muhimdir.Har qanday kichik deb qaralgan masala o‘z yechimini topmagan taqdirda, albatta bir kuni katta muammoga aylanadi. Xalq vakillari sifatida bunday holatga yo‘l qo‘yilmasligi uchun birinchi navbatda biz masʼulmiz! Muxtasar qilib aytganda, o‘z ishimizni tanqidiy qayta ko‘rib chiqishimiz lozim bo‘ladi.
Fursatdan foydalanib, Qoraqalpog‘istondagi voqealarda qurbon bo‘lgan hamyurtlarimizning oila aʼzolari va yaqinlariga o‘zim hamda senatorlarimiz nomidan hamdardlik bildiraman va sabr tilayman, shifoxonalarda davolanayotgan fuqarolarimizga esa tezroq sog‘ayib ketishlarini tilaymiz”, — dedi Senat raisi.
Avvalroq Nukusda sepilgan qizil bo‘yoq bo‘yicha qo‘shimcha maʼlumot berilgandi.
