Rossiyada og‘ir tan jarohat olgan o‘zbekistonlik Vatanga qaytarildi
Fuqaroning murojaati Tashqi mehnat migratsiyasi tomonidan ijobiy hal etildi.
Asli farg‘onalik bo‘lgan M.O. o‘tgan yilning iyul oyidan buyon Kaliningrad viloyatida ishlagan fuqaro ehtiyotsizlik oqibatida mehnatga layoqatsiz bo‘lib qoldi.
Qiyin ahvolga tushib qolgan fuqaro O‘zbekistonga qaytishda yordam so‘rab, Tashqi mehnat migratsiyasi agentligining Sankt-Peterburg shahridagi vakolatxonasiga murojaat qilganida, M.O. qurilish obyektida ishlayotganda balandlikdan yiqilib tushish oqibatida umurtqa suyagi va oyog‘i singani, uzoq muddatga mehnat qilolmasligi maʼlum bo‘ldi.
Qiyin ahvolda qolgan hamyurtimizga yordam ko‘rsatilib, xorijda mehnat faoliyatini amalga oshiruvchi fuqarolarni qo‘llab-quvvatlash hamda ularning huquq va manfaatlarini himoya qilish jamg‘armasi mablag‘lari hisobidan aviachipta olib berildi. U Kaliningrad – Sankt-Peterburg – Farg‘ona yo‘nalishidagi aviareys orqali O‘zbekistonga qaytarildi.
