“Chelsi” hali o‘zgarishlarga muhtoj
Tomas Tuxelning transferlardan ko‘ngli to‘q emas.
Londonning “Chelsi” klubida hammasi joyida emas. Bir necha oy oldin Tomas Tuxel jamoasi yangi mavsumda “Manchester Siti” va “Liverpul” bilan raqobatlasha oladigan Angliyada uchinchi kuchdek tuyulardi. Ammo ayni kunlarda klubda muammolar boshlandi. Ayniqsa, “Arsenal”ga uchralgan 4:0 hisobidagi mag‘lubiyat Tomas Tuxelning rejalarini o‘zgartirib yubordi. “Arsenal” bilan o‘yindan so‘ng tashkil etilgan matbuot anjumanida Tuxel hali qilinadigan ishlar talay ekanini taʼkidladi:
“Men jamoamning o‘yinidan umuman qoniqmadim. Biz mag‘lubiyatga loyiqmiz. Bu adolatli bo‘ldi. Chunki biz yetarli darajada yaxshi o‘ynamadik. “Arsenal” har bir bahsga jismoniy va ruhiy jihatdan ancha yaxshi tayyorlangani meni xavotirga solmoqda”.
Murabbiy klubda darhol yangi o‘zgarishlarni amalga oshirish kerakligi haqida gapirgan. Sababi, bu holat keyingi mavsumda yaxshi natijalar ko‘rsatishga imkon bermasligi mumkin:
“Menimcha, bu o‘yinda “Arsenal” o‘zining eng yaxshi tarkibi bilan o‘ynadi. Ular Premyer-liganing yangi mavsumida sovrinli o‘rinlar uchun kurashishga harakat qiladi. Lekin, bugungi bahsda biz kuchli tarkib bilan o‘ynamadik. Biroq boshqa omillar ham tashvishga solmoqda. “Arsenal” shunchalik fidoyilik va jismoniy tayyorgarlik darajasida o‘ynadiki, biz unga tenglasha olmadik. Psixologik omil ham o‘z rolini o‘ynadi va bizning zaifligimiz sezilib qoldi. Chunki ko‘plab futbolchilarimiz ketish haqida o‘ylashmoqda va boshqa variantlarni izlashmoqda. Menimcha bu muammo haqida jiddiy o‘ylashimiz kerak. Bu o‘yin mening qarashlarimga hech qanday taʼsir ko‘rsatmadi. Men xato qilishni afzal ko‘raman va jamoaning rivoji uchun bor imkoniyatimni ishga solaman. O‘tgan mavsum bir qancha muammolar ichida qoldik. O‘shanda bizga nisbatan sanksiyalar qo‘llanilgandi, baʼzi o‘yinchilar ketishdi, boshqalari hozir ham shuni harakatini qilishmoqda. Shu bois, yaxshi o‘yinchilarni zudlik bilan qidiryapmiz”.
Nega Tuxel “Chelsi” tarkibidan norozi?
Murabbiyning xavotirlarini tushunish mumkin. “Chelsi” yozda qanot himoyachisi Rahim Sterling va himoyachi Kalidu Kulibalini sotib oldi. Bundan tashqari o‘tgan mavsumda “Kristal Pelas”da ijara asosida o‘zini yaxshi ko‘rsatgan iqtidorli yarim himoyachi Konor Gallager klubga qaytib keldi.
Ammo londonliklar bir qancha yo‘qotishlarga uchradi. Romelu Lukaku, Antonio Ryudiger va Andreas Kristensen shular jumlasidan. Jamoaga yangi qo‘shilgan o‘yinchilar yuqorida sanab o‘tilgan futbolchilarning o‘rnini to‘ldirishgani yo‘q. Lukaku “Chelsi”ga qaytganidan so‘ng kutilgan natija bermadi. Shundan so‘ng u “Inter”ga ijara asosida o‘tdi. “Chelsi”da hozirda uning o‘rnini bosadigan hech kim yo‘q. Ryudiger va Kristensen jamoa bilan shartnomalari tugagach tekinga ketishdi. Antonio “Real”ga o‘tgan bo‘lsa, Andreas “Barselona” futbolchisiga aylandi.
Londonliklarning sardori Sezar Azpilikueta ham “Barselona”ga o‘tishga yaqin turibdi. Himoyachining shartnomasi keyingi yozda tugaydi. Ispan jamoasi Aspilikuetani 5 million yevroga sotib olishga rozi bo‘lgan. Ammo Tuxel o‘z futbolchisi bilan xayrlashmoqchi emas.
“Chelsi” himoyadagi yo‘qotishlardan keyin bu chiziqni to‘ldirish yo‘lini izlamoqda. Klub bir qancha futbolchilar bilan muzokaralar o‘tkazmoqda.
“Aristokratlar” “PSJ”dan Presnel Kimpembe va “Sevilya”dan Jyul Kundeni qo‘lga kiritishga urinib ko‘rishi mumkin. Agar Tomas Tuxel o‘z rejalarini amalga oshirolmasa, keyingi mavsum jamoa uchun omadsiz o‘tish ehtimoli mavjud.
Jamshidbek Amirov
