UEFA Superkubogi kimga nasib etadi?

 

Bugun Finlandiya poytaxti Xelsinki shahridagi “Olimpiyskiy” stadionida Chempionlar ligasi g‘olibi “Real Madrid” va Yevropa ligasi kubogi sohibi “Ayntraxt Frankfurt” o‘rtasida UEFA Superkubogining final uchrashuvi bo‘lib o‘tadi.

 

Xelsinkidagi “Olimpiyskiy” stadioni 2016 yildan 2020 yilgacha davom etgan rekonstruksiyadan keyin birinchi marta bunday katta tadbirga mezbonlik qilmoqda. Bu mamlakatdagi birinchi yirik Yevropa futbol finalidir. Arenaning diqqatga sazovor joyi - balandligi 72,21 metr bo‘lgan minoradir. Finlyandiyalik sportchi Matti Jarvinen 1932 yilgi Olimpiadada aynan shunday masofaga nayza uloqtirgan.

 

O‘tgan yilgi final bahsida “Chelsi” va “Vilyareal” to‘qnash kelgandi. Asosiy vaqt 1:1 hisobida yakunlangan, qo‘shimcha bo‘limlarda esa londonliklar penaltilar ceriyasida muvaffaqiyatga erishgandi. Bu Tomas Tuxel boshqaruvidagi klubning qo‘lga kiritgan ikkinchi Yevropa kubogi bo‘ldi.

 

Ushbu yozda “Real Madrid” kuchli transfer kampaniyasini amalga oshirishi kutilgandi. Ammo jamoa rahbariyati tomonidan muhim xaridlar bo‘lmadi. Kilian Mbappe “PSJ”da qoldi, Erling Holand esa “Manchester Siti”ni tanladi. Ammo, 80 million evro evaziga Aureliyen Tchuameni “Monako”dan sotib olindi. Lekin har holda jamoaning asosiy tarkibi unchalik o‘zgarmadi. Shu bois, Karlo Anchelotti o‘yinga Chempionlar ligasi finalidagi futbolchilardan foydalanmoqchi ekanligini aytdi. “Ayntraxt” ham xotirjam. Xaridlardan faqat “Bayer”dan hujumchi Lukas Alarioning transferi va “Milan” yarim himoyachisi Yens Petter Xaugening sotib olinishini qayd etish mumkin.

 

Har qanday Yevropa top-klublari singari, bu ikki jamoa ham bir nechta ramziy ko‘rgazma o‘yinlarini o‘tkazishdi. Jumladan, “Real Madrid” yozda “Barselona”ga (0:1) mag‘lub bo‘ldi. Biroq, ikkinchi bahsda “Yuventus” ustidan 2:0 hisobida g‘alaba qozondi. Mahalliy jurnalistlarning fikricha, Anchelotti Superkubokga jiddiy tayyorlanmoqda. Shu bois tayyorgarlik haftasi nomdor jamoalar bilan kuch sinashdi.

 

“Ayntraxt” allaqachon mavsumni boshlab yuborgan. Jamoa Germaniya kubogining birinchi bosqichini muammosiz o‘tkazdi. Ammo, Bundesliganing birinchi turida “Bavariya”dan oltita gol o‘tkazib yubordi. Bu yaxshi start emas, lekin ayni paytda bosh murabbiy futbolchilar bu natijaga eʼtibor qaratmaslikka hamda bor eʼtiborni “Real” bilan o‘yinga qaratishga chaqirmoqda.

 

Mutaxassislar allaqachon bu uchrashuv bo‘yicha o‘zlarining  fikrlarini bildirib o‘tishmoqda. Bukmekerlar ispan klubini favorit deb hisoblashmoqda. Shuningdek, uchrashuv sermahsul o‘tishi taxmin qilinmoqda.

Jamshidbek Amirov