“PSJ” ayrim futbolchilaridan qutulmoqchi

 

“PSJ” o‘zi ishonmagan futbolchilarni o‘rinbosarlar tarkibiga yuborishi mumkin. “L'Équipe” nashrining xabariga ko‘ra, Ander Errera, Rafinya Alkantara, Julian Draksler, Leyvin Kurzava, Mauro Ikardi, Tilo Kehrer, Idrissa Gueye va Erik Ebimbe parijliklar bosh murabbiyi Kristof Galtierga umid bog‘lashmayapti. Kecha “Monpele” bilan bo‘lib o‘tgan o‘yinda ularning birortasi o‘yin qaydnomasiga kiritilmagan.

 

Agar bu futbolchilardan birortasi klubni tark etishdan bosh tortsa, “PSJ” ularni Fransiyaning pastgi divizionida o‘ynaydigan o‘rinbosarlar jamoasiga yuborishi mumkin.

 

“PSJ” Galtierning kelishi bilan pragmatik usulga tayanmoqda. Bu qisman moliyaviy feyr-pley qoidalariga qandaydir tarzda rioya qilish zarurati bilan bog‘liq. Ammo murabbiyning pozitsiyasi ham muhim rol o‘ynadi. Galtier qimmat, ammo foydalanilmayotgan o‘yinchilarga ega klubning muxlisi emasligini aniq aytdi.

 

Klub nihoyat bu jarayonda qattiq choralarni ko‘rmoqda. Galtier chorshanba kunidan beri asosiy jamoadan alohida mashg‘ulot o‘tkazayotgan hujumchi Mauro Ikardi va unga o‘xshaydigan qolgan o‘yinchilar klubga kerak emasligini ochiqchasiga maʼlum qildi.

 

“Men 25 ta o‘yinchi bilan ishlashni xohlamayman. Bunday sondagi futbolchilarni saqlab qolishning iloji yo‘q. Hafta boshida Mauro bilan uchrashib, tarkibni yana-da qisqartirmoqchi ekanligimizni aytdim. Mauro so‘nggi mavsumlarda juda kam o‘ynadi. Uning faoliyatini qayta boshlashi muhim. Buning uchun ko‘proq o‘ziga mos joy topishi kerak. Biz eng yaxshi yo‘lni topishimiz kerak - bu nafaqat Mauro, balki klub manfaati uchun ham muhim. Ikardiga o‘z mahoratini ko‘rsata oladigan jamoa kerak. Ammo so‘nggi ikki yil uning uchun juda og‘ir bo‘ldi”, — dedi Galtier.

 

Ikardida haqiqatan ham hozirgi “PSJ”da muhim rol o‘ynash imkoniyati yo‘q. 29 yoshli hujumchi kech bo‘lmasdan oldin faoliyatini qayta boshlash uchun jamoasini o‘zgartirishi kerak. Muammo shundaki, Mauro Parijda zaxira o‘rindig‘ida o‘tirishni afzal ko‘radi. U parijliklar safida yuqori maosh oladi, shu sababli ham klubini o‘zgartirishni xohlamayapti.

 

Ikardiga qaror qabul qilishda rafiqasi va agenti Vanda Nara katta taʼsir ko‘rsatadi. Yaqinda er-xotin ajrashayotgani haqida mish-mishlar tarqalgandi. Mauro Ibizada taʼtilda o‘z sevgilisi bilan tushgan suratini eʼlon qilib, bu gaplarni rad etdi. Forvard OAVni bemaʼni gaplarni o‘ylab topishda ayblab, post yozdi.

 

Vandaga “PSJ”ning Ikardi bilan shartnomasini bekor qilishi yoqmaydi: “Mauroning klub bilan shartnomasi yana ikki yilga amal qiladi. Amaldagi shartnomani buzish uchun klub katta pul to‘lashi kerak.” — dedi Nara.

 

Naraning noroziligi klub pozitsiyasini o‘zgartirmaydi. Vanda buni tushunadi. U Mauroni boshqa klubda o‘ynashi uchun harakatlarni boshladi. “TyC Sports” nashrining xabariga ko‘ra, 29 yoshli hujumchiga "Manchester Yunayted" va “Galatasaroy” qiziqish bildirmoqda. “Manchester Yunayted” Ikardini sotib olish opsiyasi bilan ijaraga olmoqchi. Shu bilan birga, Nara “Galatasaroy” vakillari bilan uch marta uchrashgan, shuning sababli futbolchi Turkiya klubiga o‘tishi ham mumkin.

 

Yarim himoyachi Ander Errera “Atletik”ga qaytishi haqida xabarlar tarqaldi. "Cope" nashri bergan xabarga ko‘ra, 32 yoshli ispaniyalik futbolchi 2011 yildan 2014 yilgacha o‘ynagan klubi bilan printsipial kelishuvga erishgan. Ayni damda Errera “PSJ” bilan 2024 yilning iyunigacha mo‘ljallangan shartnomani bekor qilish bo‘yicha muzokaralar olib bormoqda.

 

Errera yozda juda ko‘p intervyu berib, o‘zining jamoadoshlari Kilian Mbappe, Marko Verratti, Lionel Messi, Neymar, murabbiy Galtier va umuman “PSJ” klubini maqtagan. Bu jamoada qolishga yordam bermadi, garchi Ander Parijni tark etishni istamasa ham.

 

Ispaniyalikning pozitsiyasida ancha yosh va samaraliroq raqobatchilar bor. Avval jamoa Errera kabi futbolchilarni qanday bo‘lmasin zaxirada ushlab turishi mumkin edi. Endi vaziyat o‘zgardi. Anderga o‘ziga yangi klub topishi maʼlum bo‘ldi. Fransiyaning beshinchi divizionida o‘ynash istiqbolidan so‘ng, “Atletik” varianti tezda paydo bo‘ldi.

 

Boshqa keraksiz o‘yinchilarga bir qator klublar qiziqmoqda. Insayder Fabritsio Romanoning xabar berishicha, Kehrerga “Vest Xem” va “Sevilya” daʼvogarlik qilmoqda. Parijliklar Rafinya Alkantarani Braziliya klublariga, xususan, “Botafogo”ga sotib olishni taklif qilishgan, ammo ular rad etishgan.

 

Geye esa “Everton”ga qaytishi mumkin. Britaniyaliklar 32 yoshli senegallik futbolchining transferi bo‘yicha muzokaralarni boshlab yuborgan. “PSJ” “Inter” himoyachisi Milan Shkrinyar uchun 60 million yevro va Drakslerni taklif qildi. Italiyaliklar 80 million yevro talab qilishdi, shu bois muzokaralar to‘xtab qoldi. Har holda, transfer oynasi tugashiga hali uch hafta bor. Drakslerda yangi klub izlash uchun ko‘p vaqt bor.

 

Kristof Galtier klubning kadrlar siyosatiga yondashuvini o‘zgartirmoqda. Murabbiy jamoada ishchan muhit yaratishga muvaffaq bo‘ldi. Bu Galtier bilan ishlashni yoqtiradigan “PSJ”ning asosiy yulduzlariga juda yoqmoqda.  

 

“PSJ” yulduzlari yangi murabbiyni yaxshi qabul qilishdi, uning ishlarini maqul topishdi. Galtier futbolchilarni qanday qilib ishontirishni va intizomni singdirishni yaxshi biladi. Kristof Neymar bilan muammoni hal qildi, u yana jamoa manfaati uchun ishlashga rozi. Futbolchi hech qayerga ketmoqchi emas. Mavsum endi boshlandi, “PSJ”ning istiqbollari haqida jiddiy xulosa chiqarishga hali erta. Biroq, Galtierning Parijda o‘zidan oldingi murabbiylarga qaraganda muvaffaqiyatliroq bo‘lishini ko‘rsatadigan aniq belgilar mavjud.

 

Jamshidbek Amirov