Obameyang yana Londonga qaytishi mumkin
“Chelsi” futbolchining vakillari bilan muzokaralarni boshladi.
Ushbu haftada Londonning “Chelsi” klubi “Barselona” hujumchisi Per-Emerik Obameyang atrofidagilari bilan navbatdagi muzokaralarni o‘tkazadi. Bu haqda taniqli insayder Fabritsio Romano o‘zining twitter sahifasida xabar berdi.
“Chelsi” egasi Todd Boeli futbolchining o‘zi bilan shaxsiy kelishuv shartlari bo‘yicha muzokaralar olib borishga harakat qilmoqchi. Shundan so‘ng, “aristokratlar” “Barsa”ga yangi taklif bilan chiqishga tayyor bo‘ladi.
Avvalroq, kataloniyaliklar “Chelsi”ning 14 million yevrolik taklifini rad etgani xabar qilingandi. Gabonlik futbolchining o‘zi ham hozirgi jamoasini tark etish niyatida emas. Hujumchining kataloniyaliklar bilan shartnomasi 2025 yilning 30 iyuniga qadar amal qiladi. O‘tgan mavsumda Obameyang “Barselona” safida barcha turnirlarda 24 ta o‘yinda maydonga tushib, 13 ta gol urgan.
