“Chelsi”dagi faoliyatim yakunlanganidan xafaman — Tuxel
Tomas Tuxel sobiq jamoasi haqida post qoldirdi.
Germaniyalik Tomas Tuxel 7-sentabr kuni ertalab “Chelsi” bosh murabbiyligidan bo‘shatildi. Shundan bir qancha vaqt o‘tibgina u omma oldida bayonot berdi. Nemis murabbiyi hech qaysi jurnalistga intervyu bermagan va ularning savollarini ham javobsiz qoldirgan. U shunchaki Twitterdagi sahifasiga bu haqda post qoldirdi.
“Bu men yozishim kerak bo‘lgan eng qiyin bayonotlardan biri. Biroq bu haqda yozaman deb hech o‘ylamagandim. “Chelsi”dagi faoliyatim yakunlanganidan xafaman. Bu klub men uchun o‘zimning shaxsiy uyimdek bo‘lib qolgandi. Jamoada meni a’lo darajada kutib olishgani uchun xodimlar, futbolchilar va muxlislarga chin qalbimdan minnatdorchilik bildiraman. Klubga Chempionlar ligasi va klublar o‘rtasidagi jahon chempionatida g‘alaba qozonishiga yordam berganimdan juda xursandman. Buni umuman unutib bo‘lmaydi. Klub tarixining bir qismi bo‘lganimdan faxrlanaman. O‘tgan 19 oylik xotiralar men uchun alohida o‘rin tutadi”.
Qizig‘i shundaki, Tuxel o‘zining Twitteridan kam foydalanadi. “Chelsi”da ishlagan vaqtida murabbiy sahifasiga birorta ham post yozmagan. Oxirgi xabar ikki yildan ko‘proq vaqt oldin qoldirilgan. 2020-yil aprel oyida u o‘z tarjimayi holi yozilgan kitob haqida gapirgandi.
Yangi post minglab sharhlar va layklarni to‘pladi. “Chelsi” muxlislari nemis futbolchisiga jamoadagi ushbu 19 oy uchun minnatdorchilik bildirishdi. Bildirilgan fikr va izohlarda ham iste’fo naqadar kutilmagan bo‘lganini ko‘ramiz.
Ammo bayonotdagi eng qiziq narsa qarorni Tuxel samimiy qabul qilganidir. U xodimlar, futbolchilar va muxlislarga alohida rahmat aytgan.
Murabbiy klub rahbariyati haqida hech qanday fikr bildirmagan. Sababi, rahbariyatni tanqid qilgani uchun jarimaga tortilishi mumkin. Hozircha uning shartnomasi rasman bekor qilinmagan, bu esa Tuxelga klubdagi ichki tafsilotlarni oshkor qilish huquqini bermaydi.
