Lukaku “Chelsi”ga yana qaytadimi?
Londonliklarning yangi murabbiyi belgiyalik futbolchiga qiziqish bildirmoqda.
“Chelsi” 2022 yilgi mavsum oralig‘ida transfer bozorida Yevropada eng ko‘p pul sarflagan klubga aylandi. Jamoa transferlar uchun 278,9 million yevro ishlatgan. Hozircha sarmoyalar o‘zini oqlamadi. “Ko‘k-anorranglilar” mavsumni beqaror boshlaganidan so‘ng Tomas Tuxelni bosh murabbiylik lavozimidan bo‘shatdi. Uning o‘rniga kelgan Grem Potter bir necha haftalik ish jarayonida jamoani tubdan o‘zgartira olmadi.
“Chelsi” Zagrebning “Dinamo”si va “Zalsburg”ga qarshi o‘yinda atigi bir ochko jamg‘argan holda Chempionlar ligasi guruh bosqichida oxirgi o‘rinda bormoqda. London klubi Premyer-ligada 7-turdan keyin 13 ochko bilan beshinchi o‘rinni egallab turibdi. “Chelsi” xo‘jayini Todd Bouli esa hozirgi vaziyatdan norozi va klubni yana-da kuchaytirish uchun sarmoya kiritmoqchi. Bu jarayonda xato qilmaslik juda muhimdir.
Potter “Inter”dan Lukakuni qaytarish niyatida
Bouli Potterning transfer masalalari bo‘yicha fikrini tingladi. “Chelsi” bosh murabbiyi esa “Inter”da ijara asosida o‘ynayotgan hujumchi Romelu Lukakuning Londonga qaytishiga qarshi emas. “ESPN” nashrining xabariga ko‘ra, mavsum oxirida Potter Lukaku bilan “Chelsi”dagi kelajagi haqida gaplashadi.
Romelu o‘tgan mavsumda Premyer-liganing 26 o‘yinida 8 ta gol urdi. “Chelsi” hujumchiga 2021 yilgi mavsum oralig‘ida “Inter”ga 115 million yevro to‘lagandi.
“Inter”ga qaytgan 29 yoshli belgiyalik futbolchi A Seriyaning uchta o‘yinida bitta gol urdi va golli uzatmani amalga oshirdi. Futbolchi jarohati tufayli 26 avgustdan beri maydonga tushmayapti. Ehtimol, hujumchi tiklanganidan keyin o‘z o‘yinini topib olar, ammo bu faqat nazariy fikr. Lukakuning muvaffaqiyatsiz o‘yin ehtimoli kam emas.
Har holda, “Chelsi” kelasi yozda Lukakuning kelajagini hal qilishi kerak. “La Gazzetta dello Sport” nashrining xabar berishicha, Romelu Italiya klubida doimiy qolishni istamoqda. Unga shartnomada sotib olish varianti yoki “Inter”ning majburiyati yo‘qligi yoqmayapti.
Potter Lukaku bilan gaplashib, uning “Chelsi”dagi istiqbollarini muhokama qilmoqchi. Ayni damda murabbiy futbolchining qaytishi haqida jiddiy o‘ylamoqda. O‘tmishda Romelu “Inter” hujumchisi Lautaro Martines bilan tandemda muvaffaqiyatli o‘ynagan. Potterga 3-5-2 sxemasi yoqadi, shuning uchun u bunga Lukaku mos deb biladi.
Romeluning Italiyada qolish istagi ikkinchi darajali bo‘lishi mumkin. “Inter” jiddiy moliyaviy muammolarni boshdan kechirmoqda va belgiyalik futbolchining transferi bo‘yicha so‘rovlarni qondira olmaydi. Romeluning “Chelsi” bilan shartnomasi 2026 yilgacha amal qiladi.
Biroq, ayni damda “Chelsi” Nkunku bilan shartnoma borasida kelishib oldi. 24 yoshli Kristofer Nkunku bilan 2028 yilgacha shartnoma imzolandi. Bu haqda insayderlar Fabritsio Romano va Nikolo Shira xabar berishdi. Katta ehtimol bilan londonliklar hujumchi shartnomasida ko‘rsatilgan 60 million yevro to‘lashlari kerak bo‘ladi.
Nkunkudan tashqari tarkibda yana Rahim Sterling, Kristian Pulishich, Armando Broya va Per-Emerik Obameyang bor. Lukaku esa bu hujum chizig‘i uchun ortiqcha bo‘lishi mumkin. “Chelsi” belgiyalik futbolchining Londonga qaytishi bo‘yicha katta xatoga yo‘l qo‘ymoqda. Agar, belgiyalik futbolchi jamoaga qaytadigan bo‘lsa, uning transferi omadsiz yakunlanishi shubhasiz.
“Marca” nashrining xabariga ko‘ra, londonliklar Kilian Mbappe “PSJ”dan ketishga qaror qilsa, uning uchun ham kurashga qo‘shilishi mumkin. Voqealarning bunday burilish ehtimoli biroz ishonsizroq tuyilmoqda.
OAVda esa Kilianni “PSJ” 2023 yilgi mavsum oralig‘ida sotish variantini ko‘rib chiqayotgani va hujumchining o‘zi ham ketishni o‘ylayotgani haqida bir nechta maʼlumotlar paydo bo‘lgan.
Agar Mbappe transferga qo‘yilsa, “Chelsi” jiddiy raqobat ostida qolishi tabiiy. Romelu Lukakuga esa hozirgi “Chelsi”da o‘rin yo‘q. Shu bilan birga belgiyalik futbolchining shartnomasida bir qancha muammoli masalalar mavjud.
Londonliklar uchun eng yaxshi variant nima? “Football Italia” xabariga ko‘ra, “Inter” faqat Lukakuning ijarasini uzaytirishga tayyor, chunki ularni sotib olishga puli yo‘q. Bu barcha uchun eng to‘g‘ri yechim bo‘lishi mumkin.
