Kurtua “Shaxtyor”ga qarshi bahsda maydonga tushmaydi
U jarohatidan hali qutilmagan.
Madridning “Real” klubi darvozaboni Tibo Kurtua Chempionlar ligasi guruh bosqichi 3-turidan o‘rin olgan “Shaxtyor” bilan uy uchrashuvida ishtirok etmaydi. Bu haqda Madrid klubining rasmiy sayti xabar qildi.
“Real Madrid” tomonidan eʼlon qilingan o‘yin uchun arizada uchta darvozabon bor - Andrey Lunin, Luis Lopes va Lukas Kanizares.
Avvalroq Kurtua belidagi muammo tufayli nomalum muddatga safdan chiqqani xabar qilingandi. 2-oktyabr, yakshanba kuni u Ispaniya chempionatining 7-turidan o‘rin olgan “Osasuna” bilan o‘yinda ishtirok etmadi. “Real” darvozasini ukrainalik Andrey Lunin himoya qildi. Madridliklar ochko yo‘qotdi. O‘yin esa 1:1 hisobida yakunlandi.
Kurtua joriy mavsumda “Real” safida barcha turnirlarda 9 ta o‘yinda maydonga tushdi. “Ayntraxt Frankfurt” bilan UEFA Superkubogida, shuningdek, Chempionlar Ligasining ikkita o‘yinida – “Seltik” va “RB Leypsig” bilan bahsda u o‘z darvozasi daxlsizligini saqlab qoldi.
