Maktabda o‘qituvchilarga qanday harakatlarni qilish taqiqlanadi?
O‘qituvchi o‘quvchiga o‘rnak bo‘lishi kerak. Bola maktabdagi ilk taʼlim bilan birga odob-axloqni avvalo o‘qituvchisidan oladi, unga taqlid qiladi.O‘qituvchining har bir darsi o‘quvchi uchun zanjir halqalaridek o‘zaro bog‘liq. Mabodo o‘qituvchi bir soat darsini qoldirdimi, tamom. Bilim degan poydevorga darz ketadi. O‘sha zanjir uzilib qoladi. Keyin soatlab dars o‘tadimi, qo‘shimcha saboq beradimi, foydasi yo‘q. Shu bois ham o‘qituvchi xatoga yo‘l qo‘ymasligi kerak.
Xalq taʼlimi vazirligining 2022 yil 28 iyuldagi 246-sonli buyrug‘i bilan “Umumiy o‘rta taʼlim muassasalarining ichki tartib va odob-axloq qoidalari” tasdiqlangan.
Unga ko‘ra, maktabda o‘qituvchilarga quyidagi harakatlarni qilish taqiqlanadi:
👉jamoa aʼzolari va boshqalarning shaxsiyatini, qadr-qimmatini kamsitish, ruhiy va jismoniy zo‘ravonlik ko‘rsatish;
👉o‘quvchilarni dars mashg‘ulotlaridan asossiz chiqarib yuborish yoki kiritmaslik;
👉“Chiqish” qo‘ng‘irog‘i chalingandan keyin o‘quvchilarni sinfxonada ushlab o‘tirish;
👉taʼlim muassasasiga va dars mashg‘ulotlariga spirtli ichimliklar isteʼmol qilgan, soch-soqolni tartibga keltirmagan va kiyinish odobiga rioya qilmagan holda kelish;
👉taʼlim muassasasi hududi va binosida spirtli ichimliklar va tamaki mahsulotlarini isteʼmol qilish;
👉muassasa hududi va binosida o‘quvchilarning taʼlim-tarbiyasiga aloqasi bo‘lmagan turli xil tadbirlar (tug‘ilgan kun, yubiley, iftorlik va boshqa tadbirlar bilan bog‘liq bayramona dasturxonlar)ni tashkil etish;
👉taʼlim muassasasida o‘tkaziladigan barcha tadbirlar va ularga tayyorgarlik ishlarini dars mashg‘ulotlari vaqtida o‘tkazish.
To‘lqin Jumanov va Yoqutxon Azimova,
Bektemir tumanidagi 293-maktabning Maʼnaviy-maʼrifiy ishlar bo‘yicha direktor o‘rinbosarlari
