Portugaliyaning yangi Ronaldusi
Siz uni qanchalik taniysiz?
Rafael Leau qishki transfer bozoridagi asosiy futbolchilardan biri bo‘lib turibdi. O‘tgan mavsum A Seriyaning eng yaxshi futbolchisi o‘zining ikkinchi ajoyib yilini o‘tkazmoqda. Shu tariqa u bir vaqtning o‘zida bir nechta top-klublarning eʼtiborini tortdi. 23 yoshli hujumchi “Milan” bilan 2024-yilning yoziga qadar shartnoma imzolagan, biroq u bir necha oy ichida klubini o‘zgartirishi mumkindek ko‘rinmoqda.
Leau kim o‘zi?
Leau ham Ronaldu kabi faoliyatini “Sporting”da boshlagan. Hujumchi tez rivojlandi. U 2017/2018-yilgi mavsumda Portugaliya kubogida gol urdi. Bu uning kattalar futbolidagi debyut goli bo‘ldi. O‘sha yili Leau UEFA Yoshlar ligasida oltita o‘yinda beshta gol urdi va uchta golli uzatmani amalga oshirdi. Bir yildan so‘ng esa futbolchi “Lill” klubga o‘tadi.
Fransiyada hujumchi oldinga katta qadam tashladi. Liga 1 ga o‘tishdan oldin u katta futbolda atigi beshta o‘yin o‘tkazgandi. Mazkur bahslarda ham u ikkita gol urdi va bitta golli uzatmani amalga oshirdi. 2018/2019 yilgi mavsumda Leau Fransiya chempionatining 24 ta o‘yinida sakkizta gol urdi va ikkita golli uzatmani amalga oshirdi. Rafaelning “Lill” bilan shartnomasi 2023 yilning yoziga qadar tuzilgan edi. Ajoyib o‘yinlardan so‘ng fransuz klubi istiqboli bor yigitni “Milan”ga 29,5 million yevroga sotib yubordi.
Portugaliyalik futbolchi Italiyada to‘rt mavsumdan beri faoliyat olib borib kelmoqda.
2019/2020-yilgi mavsum - 31 o‘yin, 6 gol, 2 golli uzatma;
2020/2021-yilgi mavsum - 30 uchrashuv, 6 gol, 6 golli uzatma;
2021/2022-yilgi mavsum - 34 o‘yin, 11 gol, 10 golli uzatma.
Bundan tashqari, o‘tgan mavsumda Leau “Milan” tarkibida Italiya chempioni bo‘ldi. Bundan tashqari mavsumning eng yaxshi futbolchisi deb topildi. Shuningdek, Portugaliyaning asosiy jamoasida debyut qildi. Hujumchi terma jamoa safida 11 o‘yin o‘tkazib, ikkita golli uzatmani amalga oshirgan. Klub tarkibidagi o‘yinga kelsak, Leau mavsumni juda yaxshi boshlad. U Chempionlar Ligasining to‘rtta o‘yinida uchtadan golli uzatmani amalga oshirdi va A Seriyaning sakkizta uchrashuvida to‘rtta gol urdi va shuncha golli uzatmani amalga oshirdi.
Yevro-2016da g‘alaba qozongan Portugaliyada ikkita kuchli hujumkor o‘yinchi bor edi. Bular Diogo Jota va João Feliks. Leau ham Portugaliyaning yangi asosiy yulduziga aylanishi mumkin. Uning katta turnirlarda tajribasi yo‘q, ammo aynan Rafael Fernando Santos uchun hozir muhim hujumkor o‘yinchi hisoblanadi.
Hozirda “Milan” rahbariyati portugaliyalik bilan shartnomani yangilamoqda, chunki unga allaqachon “Manchester Siti”, “Chelsi” va “PSJ” qiziqish bildirmoqda. “Mediafoot” nashrining xabariga ko‘ra, parijliklar vingerni 150 million yevroga sotib olishga tayyor. Ammo “Milan” futbolchini saqlab qolish uchun bor kuchini sarflamoqda. “Football Italia” nashrining xabariga ko‘ra, klub rahbariyati hujumchiga shartnoma taklif qilish rejalashtirgan.
Milan sport direktori Paolo Maldini futbolchi haqida quyidagi fikrlarni bildirib o‘tdi:
“Biz Rafael Leau bilan shartnomani uzaytirmoqchimiz. Chunki, biz uning o‘sishiga yordam beradigan eng yaxshi klubmiz. Biz hali ham muzokaralar olib borishimiz va kelishuvga erishishimiz kerak”.
Maldini “Milan”ni Leau uchun ideal klub deb hisoblasada, uning jamoada qolish ehtimolini yuqori baholamadi. Agar kimdir portugaliyalik futbolchi uchun katta miqdorda (100+ million yevro) taklif qilsa, uni sotishi mumkin.
Qatarda bo‘lib o‘tadigan 2022-yilgi jahon chempionati futbolchining “Milan”dan ketish yoki ketmasligini belgilaydi. Portugaliyalik futbolchi bundan avval yoshlar o‘rtasidagi Yevropa chempionati g‘olibi va kumush medali sohibiga aylangan. Endi to‘rt yillikning asosiy turnirida o‘zini ko‘rsatish vaqti keldi.
