O‘runov “Navbahor”ga o‘tishga yaqin turibdi
U O‘zbekistonda mavsum tugashini kutmoqda.
“Spartak” va “Ural” klubining sobiq futbolchisi Oston O‘runov O‘zbekistonga qaytishga yaqin turibdi. Yarim himoyachining xizmatlariga “Navbahor” klubi qiziqish bildirmoqda. Bu haqda “Metaratings” nashri xabar berdi.
Manba bergan xabarga ko‘ra, O‘runov yaqin kunlarda “Navbahor”ga o‘tish bo‘yicha yakuniy qarorni qabul qiladi. Agar “Navbahor” OCHL yo‘llanmasini qo‘lga kiritsa, O‘runov klub taklifiga rozi bo‘ladi. Shuning uchun Oston O‘zbekistonda mavsum yakunlanishini kutmoqda.
Qayd etilishicha, Oston Koreyaning “Jonbuk Motors” klubiga ham o‘tishi mumkin edi, biroq klub eʼtiborini boshqa futbolchiga qaratgan.
Ayni damda “Navbahor” O‘zbekiston chempionatida uchinchi o‘rinni egallab turibdi. Turnirda birinchi va ikkinchi o‘rinni egallagan jamoalar to‘g‘ridan-to‘g‘ri Osiyo chempionlar ligasiga yo‘llanma oladi. 3 va 4-jamoalar esa saralash orqali Chempionlar ligasiga chiqadi.
Eslatib o‘tamiz, Oston O‘runov “Paxtakor” klubi tarbiyalanuvchisi hisoblanadi. Rossiyada u “Spartak”, “Ufa” va “Ural” klublarida o‘ynagan.
