Ekspert: Afg‘onistondagi barqarorlik butun TDT makoniga ijobiy taʼsir ko‘rsatadi

 

Turkiy davlatlar tashkilotida iqtisodiy, madaniy-gumanitar va ilm-fan sohalaridagi tashabbuslar bilan birga xavfsizlik yo‘nalishidagi hamkorlik ham muhim ahamiyat kasb etadi. Zamon.uz ushbu masala va TDT makonidagi xavfsizlikka tahdidlar bo‘yicha mutaxassis fikri bilan qiziqdi.

 

Omonulla Muhammadjonov, yuridik fanlar doktori, professor:

 

— TDTning birinchi sammiti turli sohalar qatori, xavfsizlik masalasidagi o‘zaro hamkorlikni kuchayishiga olib keladi. Tashkilotga aʼzo davlatlar turli yo‘nalishlar qatori, xavfsizlik sohasida ikki va ko‘p tomonlama kelishuvlarga ega.

 

Ayniqsa, hozirgi murakkab vaziyatda tinchlik va xavfsizlik bo‘yicha hamkorlik alohida ahamiyat kasb etadi. TDT makonida taraqqiyotga xizmat qiladigan omillar bilan bir qatorda, unga to‘sqinlik qiladigan faktorlar ham bor.

 

Jumladan, Markaziy Osiyo mamlakatlari uchun Afg‘onistondagi vaziyatning barqarorlashuvi muhim sanaladi. O‘zbekistonning afg‘on yo‘nalishida ochiq va o‘zaro manfaatli siyosatini alohida qayd etish lozim. Ayniqsa, so‘nggi yillarda Afg‘onistonga yondashuv tubdan o‘zgardi. Avvallari tahdid makoni sifatida ko‘rilgan bu mamlakat hozirda Markaziy Osiyo iqtisodiy makonining ajralmas qismi deb taʼkidlanmoqda. Afg‘onistondagi barqarorlik nafaqat mintaqa, balki butun turk dunyosidagi xavfsizlikka taʼsir ko‘rsatadi.

 

Kavkaz mintaqasidagi vaziyatni ham alohida qayd etish lozim. So‘nggi yillarda Qorabog‘da kuzatilayotgan  keskinlik TDT makoniga ham taʼsir ko‘rsatdi. Ushbu muammoni siyosiy vositalar yordamida hal qilish katta ahamiyatga ega.

 

Umuman, TDT doirasida xavfsizlik sohasidagi hamkorlikning kuchaytirish unga aʼzo davlatlar taraqqiyoti va barqaror rivojlanishiga xizmat qiladi.